AFC Cup final khel tur Chhetri a phur

Indian club zinga AFC Cup final lut hmasa ber Bengaluru FC captain Sunil Chhetri chuan November 5-a Iraqi club Al-Quwa Al-Jawiya nen Asian club inelna ngaihhlut ber dawttu nomawi an inchuh tur chu a career-a match ropui ber tur a nih thu a sawi.

Sporting Lisbon B striker hlui hian kum 2008 AFC Challenge Cup final-ah khan hattrick a siam a, kum 27 hnua a vawi khat nan Asian Cup-ah India a tlinpui. Mahse, Chhetri chuan AFC Challenge Cup final ai chuan AFC Cup final chu a lian zawkah a ngai.

MLS club Kansas City Wizards tan a khelh laia Manchester United pawh lo hmachhawn tawh striker chuan, "AFC Challenge Cup final kha a ropui a, mah se tuna mi hi chu a danglam bik a ni. Kum thum leh a chanve chhung lekin Indian club dangin an la tih theih ngai loh kan ti a, a awlsam lo. Hei vang hian ka tan chuan match ka khelh tawh zawng zawnga pawimawh ber a ni dawn," tiin a sawi.