Goal nen Bony a inlar ta
Manchester City aṭanga loan-a Stoke City zawmtu striker Wilfried Bony chuan tun season-a a goal hmasa ber a khung a, Swan-sea City lamah goal hnih khungin Thawhṭanni zan khan Welsh club lakah a team hi 3-1 in hnehna a chanpui - Stoke tan Premier League match thum chhung a zawna hnehna an channa a ni ta.
Ram leh club tan inelna hrang hranga match 23 chhung zet goal khung tawh lo Bony hian minute 3-naa goal hmahruai a khung hnuah Swansea tan Wayne Routledge chuan minute nga hnuah an si phur a sut ve lehnghal. Mahse, Welsh club defender Alfie Mawson-a'n minute 55-naa an lama a tih luh hnuah Swansea an tho tawh lo a, Bony chuan minute 73-naah an chak nemnghehna goal a khung.
Stoke harhna
Mark Hughes enkawl Stoke City-in tun hnaiah harhtharna an chang a, inelna hrang hranga an match hnuhnung pangaah hnehna an la chang vek. Stoke khelhṭhat lai pawha goal khung thei lo Bony-a'n goal a khung leh ta bawk a, Premier League table-a 12-na dinhmuna invawrh chho club hi an phur lehzual khawp ang.
Swansea tan an mikhualna rama ral hlauhawm ber chu an player hlui pahnih an ni. Etihad Stadium a pan hmaa Premier League-a a hming chher nana Swansea hmangtu Bony-a'n goal hnih a khung bakah Joe Allen chuan assist vawi hnih a nei a, Liverpool a zawm hmaa Swans player pawimawh pawl ni ṭhin hian nipui bazar-a amah lakluhna hun ṭha bawhpelhtu a club hlui Swansea inchhirna a thlen.
Stoke tan Charlie Adam chuan vawi hnih zet post a pet per bawk a, Austrian forward Marko Arnautovic-a'n Swansea goalkeeper Lukasz Fabianski a tlan hel hnuah goal khungna hun remchang nei mah se post pet per nan a hmang bawk.
Harh thei lo Swansea
Swansea-in French manager Francesco Guidolin enkawlna hnuaiah beisei anga bul an ṭan loh hnuin USA coach hlui Bob Bradley an lalut a, American zinga Premier League club enkawl thei hmasa ber hnuaia an match hmasa pahnihah Swansea-in Arsenal 3-2 a hneh loin Watford an inhnehtawkpui a, heng match hnihah hian an hmasawnna hmuh tur awm mah se Stoke lakah erawh an theihnain an khel chhuak lo.
Mikhual team tan match danga an innghahna ni ṭhin Ki Sung-yueng leh Leroy Fer te an hmuhnawm thei lo a, tlarhma lamah Juventus striker hlui Fernando Llorente leh club player manto ber substitute Borja Baston te goal khung châkin tuihal mah se ball ṭha an hmuh miau loh avangin an beisei goal an khung thei lo.
Eng nge an sawi?
Stoke manager Mark Hughes chuan, "Awlsam taka hnehna chang mai thei kan nih laiin kan buai leh ṭhin zawk a ni. Wilfried Bony hian engtikah emaw chuan goal a la khung ang tih ka chiang em em a, zaninah a thleng ta. Ani leh Joe Allen ten kan club an rawn zawm hnuah an khel
ṭha em em reng a ni," tiin player khelṭha pahnih a fak.
Hughes chuan Allen fak chhunzawmin, "Joe Allen hi chu player danglam bik a ni a, ball kal dan tur hi a thlir thiam lawk avangin zaninah pawh khan goal nawr pui turin ka ti a ni," tiin Liverpool midfielder hlui chu a fak hle - Allen hian tun season league match sawm a inlanah goal li khungin assist pahnih a nei tawh.
Swansea boss Bob Bradley chuan, "Ṭha taka tih chang chu nei ṭhin mah ila, inkhel pumpui thlirin inrintawkna kan tlachham tih a lang a, hun pawimawhah kan theihna angin kan khel chhuak lo," tiin a naute khelh danah a lawm lo - Swans hian Premier League match kuaah a zawnin chak hmel an hmu ta lo a, kum 2011 hnua an result chhiat zawn rei ber ṭum a ni.