Europe-ah Leicester ropui zel dawn em?
Leicester City-in Champions League match thum an khelh tawhah la chak vekin point kua an hmu tawh a, an point hmuh zat hi knockout stage luh nan a tawk tawk hial thei a. Chutihrualin Claudio Ranieri hoten zanin dar 1:15-a FC Copenhagen an hneh thei a nih chuan chhiarkawp dan ang thlapin last 16 an lut ang.
Europe-a dinhmun ṭha Leicester City hian kartawp khan White Hart Lane-ah Tottenham Hotspurs 1-1 in an draw a, Premier League lama Foxes aia che ṭha zawk Spurs hi Champions League lamah erawh an chefuh lo. Zanin hian Mauricio Pochettino hote hian German club Bayern Leverkusen an mikhual dawn a, point thum an hmu lo a nih chuan an hmabak a êng lo.
Mahni ramah Schmeichel
Leicester keeper Kas-per Schmeichel chu FC Copen-hagen hmachhawn turin an khuaah a let dawn a, inkhelhna hmun tur Telia Parken hi Denmark-a an in aṭangin kein minute hnih lek kal a ni.
Copenhagen mual hi Schmei--chel-a tan hmun thar a ni lo a, Denmark-in an home match an khelhna hmun a nih avangin vawi engemaw zat a inlan tawh. An khingpui tur Danish club-ah pawh hian Schmeichel-a'n an ram team-a a khelhpui tawh pariat zet an awm bawk.
Foxes goalkeeper Schmei-chel chuan, "Ka khingpuite hi ka hrechiang a, an thawhrim bakah an ingaitlawm hlawm hle. Inelna sang taka Danish club ka hmachhawn thei hi ka lawm a, Danish football hi ngaihven mah ila club ṭan bik erawh ka nei lo," tiin a sawi.
Engtin zel?
King Power Stadium-ah October 18 khan club pahnih hi an intawng tawh a, Leicester-in Riyad Mahrez goal hmangin Copenhagen hi an hneh. Danish club-in inelna hrang hrangah match 23 hneh loh an tawng loh hnua chak loh hmel an hmuh hmasak ber a ni a, Champions League bikah club lian ni lo mah se Copenhagen hian tun hnaiah result an neih ṭhat avangin vanduai theihna an ni.
Foxes hian tun season-ah an mualah hneh loh an la tawng lo a, khualmualah erawh chhuan tur an nei lo - league-ah match nga an khelh tawh aṭangin point khat chiah an la hlawh chhuak.
Leicester boss Claudio Ra-nie-ri chuan, "Tottenham kan hmachhawn danah khan ka lawm a, ball zawng zawng chan ka tum. Hetianga kan khelh chuan chak lo pawh ni ta ila kan lawm hrim hrim a, team anga theihtawp chhuah hi ka duh a ni," tiin Spurs an draw chunga a lungawi thu a sawi.
Group G inkhel dangah FC Porto leh Club Brugge te an inkhel dawn a, Belgian club Brugge hian point la hmu lo mah se an chunga awm Porto leh Copenhagen ten point li chauh an la hmuh avangin knockout stage lut thei dinhmunah an la ding.
Spurs tan Lloris
Tottenham Hotspur-in Champions League-a an match hnuhnung berah goal awm loin Bayer 04 Leverkusen an draw hram a, Germany-ah Spurs keeper Hugo Lloris-a'n ropui taka Javier Hernández goal khung tur a dan sak zarah point khat an hlawh chhuak hram.
Zaninah erawh Spurs-in an mualah German club hi an hmachhawn tawh dawn thung a, goalkeeper Hugo Lloris pawh hna hahthlak lutuk a neih tawh loh beisei a ni. Tottenham hian league match 10-ah hneh loh an la tawng lo a, amaherawhchu vawi nga zet an khingpui an draw tawh avangin table-ah pangana chauh an hauh pha.
Mauricio Pochettino hote hian October thla tira Manchester City an hneh hnuah West Brom, Bournemouth, Leicester City leh Bayer Leverkusen te an draw bakah Liverpool (EFL Cup) an hneh lo. Spurs boss Pochettino chuan, "Tun hnaiah result ṭha kan nei lo a, amaherawhchu league-ah hneh loh kan la tawng lo a, hei hi thu lawmawm a ni. Kan tan chuan Leverkusen kan mikhual hunah point thum hmuh theih hi a pawimawh a ni," tiin chak ngei a tum thu a sawi.
Spurs hian Champions League-a Leverkusen an mikhual zawh hian Pathianni tlaiah Arsenal an hmachhawn leh dawn a, an hmabak a awlsam lo. Group E inkhel dangah Monaco leh CSKA Moscow te an inkhel dawn a, Russian club tan beiseina nei ve zel turin khualmualah point thum hmuh a pawimawh.
Last 16 lut thei an awm em?
Group E
• Zaninah engmah a la chiang dawn lo.
Group F
• Dortmund (7 Pts) tan Sporting Lisbon (3 Pts) hneh a tawk.
• Real Madrid (7 Pts)-in Legia Warszawa (0 Pt) an hneh a, Dortmund an chak a nih bawk chuan Zinedine Zidane-a hoten last 16 an lut ang.
Group G
• Leicester (9 Pts) tan FC Copenhagen (4 Pts) hneh a tawk a, Porto (4 Pts) in Club Brugge (0 Pt) an hneh loh bawk chuan Premier League champion hi hmahruaitu an ni chiang ang.
Group H
• Juventus (7 Pts) tan Lyon (3 Pts) hneh a tawk.
• Sevilla (7 Pts)-in Dynamo Zagreb (0 Pt) an hneh a, Juve an chak bawk chuan Spanish club-in last 16 an lut ang.
Note : Champions League group stage-a pathumna hian Europa League an la khel leh thei a, palina erawhin beisei tur an nei lo thung ang.
Zanin Inkhel Tur
Monaco 1:15 AM CSKA Moscow
Tottenham Hotspur 1:15 AM Bayer Leverkusen
Borussia Dortmund 1:15 AM Sporting CP
Legia Warszawa 1:15 AM Real Madrid
FC Copenhagen 1:15 AM Leicester City
Porto 1:15 AM Club Brugge
Sevilla 1:15 AM Dinamo Zagreb
Juventus 1:15 AM Olympique Lyonnais
Team Dinhmun
Group E
# Team Pld W D L GF GA GD Pts
1 Monaco 3 1 2 0 4 3 1 5
2 Tottenham Hotspur 3 1 1 1 2 2 0 4
3 Bayer Leverkusen 3 0 3 0 3 3 0 3
4 CSKA Moskva 3 0 2 1 3 4 -1 2
Group F
# Team Pld W D L GF GA GD Pts
1 Borussia Dortmund 3 2 1 0 10 3 7 7
2 Real Madrid 3 2 1 0 9 4 5 7
3 Sporting CP 3 1 0 2 4 4 0 3
4 Legia Warszawa 3 0 0 3 1 13 -12 0
Group G
# Team Pld W D L GF GA GD Pts
1 Leicester City 3 3 0 0 5 0 5 9
2 FC Copenhagen 3 1 1 1 5 2 3 4
3 Porto 3 1 1 1 3 3 0 4
4 Club Brugge 3 0 0 3 1 9 -8 0
Group H
# Team Pld W D L GF GA GD Pts
1 Juventus 3 2 1 0 5 0 5 7
2 Sevilla 3 2 1 0 2 0 2 7
3 Olympique Lyonnais 3 1 0 2 3 2 1 3
4 Dinamo Zagreb 3 0 0 3 0 8 -8 0