Bhaichung leh Jeje huang khatah

Indian Super League club Chen-naiyin FC striker Dudu Omagbemi chuan South Indian club tana a khelhpui Jeje Lalpekhlua chu India legend Bhaichung Bhutia leh Sunil Chhetri te nen huang khatah an awm thu a sawi.

Polish club ṭha Wisla Krakow tan a khelh laia league nomawi lo chawi tawh Nigerian striker chuan, "Tun hnai kum rei lote chhungin Jeje hian hma a sawn nasa a, training-naah ka hmu fo ṭhin a, a thawkrim em em reng bawk. Ka sawi duh chu, hun rei loteah Jeje hi India national team tan innghahna ber a la ni ang tih hi a ni," a ti.

Dempo leh East Bengal tan pawha lo khel tawh Dudu chuan sawi chhun-zawmin, "Indian football legend Bhaichung Bhutia leh Sunil Chhetri te nen pawh kan lo khel ho tawh a, anni pahnih neih ang hi Jeje pawn a nei a ni," tiin Chennai club tana a khelhpui chu a fak hle.

Jeje-a khelhna Chennaiyin hian zanin dar 7:00-ah ISL match khel turin Mumbai City an mikhual dawn. Chennai club-ah hian Jeje bakah Jerry Lalrinzuala chu player pawimawh a ni a, Bethlehem rawlthar hian ISL khelh mekah Emerging Player of the Match chawimawina vawi li a dawng tawh.

Hetihlai hian Bengaluru FC striker Daniel Lalhlimpuia chu Bangalore club hian AFC Cup final an luh avangin ISL-ah a la inlan thei lo a, Mumbai City zawm tur Lalchhuanmawia Fanai pawh Bangalore club hian an la chhuah thei rih lo.

Mumbai City-ah hian David Lal-rin-muana leh Lalhmangaihsanga Ralte (Sena) te an awm bawk a, North Mualcheng tlangval Sena hian Emerging Player of the Match chawi-mawina vawi hnih a dawng tawh.