Conte huaiah Moses a hlim

Victor Moses chuan Anto-nio Conte-a kaihhruai Chelsea-ah hun nuam leh hlimawm tak a hman thu leh an khelh dan chu nuam a tih thu a sawi.

Nigeria international Moses hian kum 2012 khan Wigan aṭangin Chelsea hi a zawm a, beisei angin Stamford Bridge-ah hian hmun a chang tam lo. Blues a zawm aṭanga kum thum chhungin Liverpool, Stoke City leh West Ham United-ah te loan hmangin a chhuak.

Chelsea manager thar Conte hnuaiah winger Moses hi wing back atan hman a ni a, goal nawr mai bakah a venhim lam hna thawk turin a tlan let nasa hle - an league match hnuhnung paliah inkhel bul ṭan vekin player pawimawh berte zinga mi a ni mek.

Kum 25-a upa Moses chuan, "Tun hma lam chuan hetiang hmunah hian ka la khel ngai lo a, tunah erawh chuan nuam ti takin ka khel thei tawh. Manager thu sawi ngun takin ka ngaithla a, ka hnungah Cesar Azpilicueta a awm bawk avangin ka thlamuang ṭhin. Ani bakah hian Pedro leh Wilian te nen kan inman em em a, ka khelh dan hi nuam ka ti hle," tiin a sawi.

Italian manager Conte hian Juventus leh Italy team a enkawl laia a lo hlawhtlinpui tawh ṭhin angin defender pathum hmaah midfielder panga a dah ṭhin a, Moses leh Marcos Alonso te chu wing back an ni. Blues hian Arsenal an hneh loh hnuah Premier League match li khel leh tawhin hnehna an chang vek a - goal an chhuah miah lo bawk.