MBL - Zan dar 8:00 Mission Veng Vs Champhai

Zanin hian Hrangbana Memorial 2nd Mizoram Badminton League-ah Mission Veng chu a vawi khatna atan an inlan dawn a, an khingpui tur chu Champhai Smashers an ni.

Nimin tlai khan Champhai hi Tuikual Shuttlers nen Electric YMA Hall-ah an inkhel tawh a, result erawh kan hre hman lo. MBL inkhel en man hi Rs 10 chauh a ni a, Zonet-in match zawng zawng hi live-in a pe chhuak bawk.

Mission Veng chu...

Mission Veng hian Mizoram number 1 Manajit Singh chu lilamnaah an chang a, hetah hian lungawi mai loin Karnataka rawlthar Abhishek Yeligar an chah chhuak bawk.

Karnataka shuttler Abhisek hian Badminton Association of India (BAI)-ah ranking chhuan tur nei lo mah se Badminton World Federation (BWF) hnuaiah match 14 zet a khelh aṭanga vawi sarih a chak bawk avangin MBL khel tur chuan a ṭhat tawk viau beisei a ni.

Mixed doubles khel turin Hming-thianghlimi an nei a, a kawppui tur hriatthiam la har. Singles-a Mizoram number 1 Manajit hi mixed doubles ranking-ah pahnihna a nih phak tho avangin Hmingi nen an inkawp a nih pawhin a mak lo ang.

Mission Veng hian 35+ men's doubles ranking number 2 Lalrindika Ralte an kawl a, a kawppui turin Albert Lalnunhlima chiah an nei. Champhai laka result ṭha nei turin Mission Vengin player an rem uluk a ṭul ang.