World Cup nomawi siamtu a thi

FIFA World Cup nomawi siamtu Silvio Gazzaniga chu Thawhṭanni khan lungphuchawlin a thi a, kum 95-a upa a ni. Gazzaniga fapa Giorgio chuan a pa thih thu hi nimin khan khawvel hriatah a puang.

Giorgio chuan, "Ka pa chu Thawhṭanni zing khan a muhil kan kaitho thei lo a, hahdam takin a chawl a ni," tiin a sawi a, Gazzaniga hi tun hnaiah dam lohna avangin damdawi in luhpui zeuh zeuh a ni a, Milan khawpuia an chenna inah a thi a ni.

Kum 1970-a a vawi thum nan Brazil-in World Cup nomawi an chawi khan an hlawhtlinna ropui tak hriatreng nan Jules Rimet trophy chu kawl hlentir an ni a, tuna World Cup nomawi atana hman mek hi kum 1971 khan Gazzaniga hian a siam a ni. FIFA chuan Gazzaniga nomawi chei an pawm hma hian khawvel ram pasarih aṭangin nomawi siamtir tura dilna 53 zet an dawng.