United first team-ah Basti a kir

Manchester United-in mana-ger atana Jose Mourinho an lakluh hnua first team zinga training la nei leh loBastian Schweinsteiger chuan a vawi khat nan United first team training a zawm a, kum 32-a upa midfielder hian a hma zawng khan Under 23 zing a nih loh chuan mimalin training a nei ṭhin.

Germany captain hlui Schweinsteiger hian United tana a khelh hnuhnung ber chu March khan a ni tawh a, hetihlai hian Old Trafford-a amah laluttu Louis van Gaal enkawlna hnuaiah a khel a ni. Schweini hian August thla khan amah chhawr duh lotu Mourinho nen mimala inhuatna an neih loh thu a sawi a, United chu Europe-a a club hnuhnung ber tur a nih thu a sawi zui bawk.

United left-back Luke Shaw chuan, "Kan zinga Basti a lo kir leh ta hi kan lawm a, dressing room leh khelmual chhunga minti phur thei khawp player
ṭha a ni a, a bik takin keimah anga player naupangte tan a lo kir leh ta hi thu lawmawm a ni," tiin an zinga Basti a training ve leh ta chu a lawm hle.

Schweinsteiger hian first team training zawm mah se Europa League group stage squad-ah a tel loh avangin Europe club inelna sang ber dawttuah hi chuan a inlan thei dawn lo a, Premier League squad-ah erawh a awm sa. FIFA World Cup-a Germany champion puitu midfielder Basti hian first team tana a training loh chhung hian United leh Mourinho hi a chhe zawngin a sawi ngai lo a, EFL Cup-a Manchester City an hneh hma pawhin social media kaltlaing duhsakna a hlan.

Hetihlai hian season hmasaa Bundesliga Player of the Season Henrikh Mkhitaryan chu United squad-ah pawh a awm phak loh hnuah first team zinga a training hmuh leh tawh a ni bawk.