Harsatna ngam loh Gareth Bale

Real Madrid-a kum ruk dang cham chhunzawm tura contract ziak hlim Gareth Bale chuan Santiago Bernabeu a pan hnuah harsatna a tawh thu a zep lo. Kum 27-a upa forward hian Real-a a season hnihnaah beisei a phak loh vang leh hliam vangin sawisel a tawk nasa a, Real fan-ten a inkhelh ṭumin an au el hial.

Mahse, Bale chuan a season duhawm lo chu hnual phah nana a hman loh thu sawiin, "Real-ah hian season duhawm lo tak hman kum ka nei ngei a, mah se ka harsatna tawhte khan player ka nihna piah lama ka mimal nunah hlawkna nasa tak min pe a, harsatna hmachhawn dan min zirtir a ni," tiin a sawi.

Real Madrid tan season hnih lek a khelh chhunga Champions League nomawi pahnih, Spanish Cup (1), FIFA Club World Cup (1) leh UEFA Super Cup (1) chawi thei player hian Real-a a contract thar ang chuan kar khatah chhiah paih vek hnuah £350,000 a hlawh niin an sawi a, Bale chuan, "Ka hlawh zat hi chu keima hriat tur a ni a, mipui vantlang hriat tur a ni lo," tiin a hlawh zat chiang takin a sawi duh lo.

Champions League nomawi kawl lai Real Madrid hian zanin dar 1:15-ah Polish club Legia Warszawa chu Champions League group stage match khel turin an lenchilh ang.