Arsenal, Atletico, Bayern leh PSG an tlang

Goal hnih an phurh zet hnuah Arsenal-in an mikhualna ramah Mesut Ozil-a goal khung hmangin Ludogorets Razgrad 3-2 in an lehthal a, point 10 hmuin Arsene Wenger-a naute hian a zawnin season 17 chhung chu Champions League knockout stage an lut ta.

Thawhlehni zan inkhel dangah season hmasa finalist Atletico Madrid, German champion Ba-yern Munich leh French cham-pion Paris St-Germain ten an khingpui ṭheuh hnehin last 16 an inhlangkai ve bawk.

Gunners chakna Ozil

Wenger-a'n 6-0 a an sawp tawh Bulgarian club lakah player ṭha a chawlhtir lo a, a dan pangngaiin Premier League lama a chhawr rim Petr Cech aiah David Ospina a luhtir thung. Sunderland laka goal hnih khungtu Olivier Giroud chuan tun season-a a vawi khat nan inkhel bul ṭanin tlarhma laiah a awm - Giroud-a awm loh laia central striker atana chhawr ṭhin Alexis Sanchez chu left wing-ah a tawlh phei thung.

Arsenal tlarhnung ban rinawm Laurent Koscielny leh Shkodran Mustafi te inkawp lehin training-na lama hliam tenau tuar Hector Bellerin aiah Carl Jenkinson dahluh a ni. Inkhel ṭantirah Gunners tlarhnung a buai nghal, minute 12-na lekah Barbosa chuan goal khungin Claudiu Keseru (15) chuan a chhunzawm zat bawk.

Gunners an awm mai mai bik lo, midfielder Granit Xhaka chuan Ozil-a cross chu yard 15-a hla
aṭanga khungin Giroud chuan first half tawp hma chiahin an si purh sut zawh nan goal khat a tauh lut.

Second half-ah team pahnih an fimkhur a, goal lut zui loin an
ṭin mai dawnin a lang hman. Hun tawp hma minute thum chauh a awm tawh tihah Ozil a rawn inlar! Mohamed Elneny-a through ball dawngtu Germany international Ozil hian keeper Milan Borjan a chip khum hnuah defender pahnih bum lehin a ball thiam chungchuanzia a lantir hnuah goal ropui a khung a, khualmualah Arsenal-in hnehna hlado an chham.

Kum 28-a upa Ozil hian tun season-ah Arsenal tan inelna hrang hrangah goal sarih a khung der tawh a, season hmasaa a khung goal riat a hnaih tawh hle. Tun hnaia Arsenal match hnuhnung pangaa an goal pariatah a inrawlh vek a, vawi nga a pet goal bakah a ṭhiante khung tur vawi thum a siamsak bawk.

Arsenal manager Wenger chuan, "Mesut Ozil khan inkhelh ṭan tirhah goal khung theihna hun nei mah se a ṭhiante tan a hun a hmang zawk a, a tawpah erawh a theihna sanzia thup theih a ni lo. Ṭha taka khelh reng theih a ni lo a, chutiahrualin Paris St-Germain hnehin group hmahruaitu kan nih theih ka beisei," a ti.

PSG an tluang

Group A inkhel dangah Paris Saint-Germain chuan Blaise Matuidi leh Thomas Meunier te goal khung hmangin Swiss club Basel chu 2-1 a hnehin last 19 an inhlangkai bawk. Ligue 1 champion hian an match hmasa bera Arsenal an inhnehtawkpui hnuin Champions League match thumah hnehna an chang a, inkhelh hmabak pahnih an la neihah Gunners nen group hmahruaitu nih an inchuh ang.

PSG manager Unai Emery chuan, "Khualmuala inkhel kan nih avangin a awlsam lo, hun tawp lam minute 15 chhunga kan goal hnihna khung tura ka naute tumruhna kha ka fak a, a ropui ka ti. Hnehna kan chan bakah last 16 kan lut a, hei hian player-te ah pawh inrintawkna a siam sak ngei ka beisei," tiin a sawi.

French club lian hian league bakah Europe-a hlawhtlin an duh avangin Sevilla coach an chhuhsak a, a zawna Europa League nomawi vawi thum chawi thei Spanish manager lakah fiahna hautak an hmachhawn chhunzawm zel dawn.

Atletico leh Bayern an tlang

Antoine Griezmann-a'n khaw-vela a ṭha berte zinga tel phak a nih zia chu Russian club Rostov lakah a pholang leh ta. France international Griezmann hian tawih zetin goal hmahruai a khung bakah hun tawp hma chiahin 2-1 a an chakna goal a khung bawk.

Diego Simeone-a naute hian an league match hmasa paliah hnehna an chang vek a, Group D-a an elpuite an hneh kim vek. Argentine manager kaihhruaina hnuaiah Spanish club hian an khelmual Vicente Calderon an hmang thiam hle - Champions League match 19 an khelh aṭangin an mikhual lakah goal li chiah an la chhuah.

Atletico Madrid manager Si-mone chuan, "Vawiin khan ka naute ka khelhtir danah ruahmanna fuh lo ka nei zeuh zeuh a, mahse ka nauten ka tihsual an hliahkhuh theih avangin ka lawm hle. Griezmann khan kan mamawh goal hnih min pe a, a chungah kan lawm hle, ani hi ka player-te zinga ṭha leh hlauhawm berte zinga mi a ni," tiin a sawi.

Carlo Ancelotti kaihhruai Bayern Munich-in an match hmasa berah Atletico Madird hneh lo mah se a zawnin vawi thum hnehna an chang leh ta. German champion tan Poland striker Robert Lewandowski chuan PSV Eindhoven lakah a club hi 2-1 a hnehna chanpuiin goal hnih a khung bakah woodwork vawi thum a tih per bawk. Bayern striker hian tun season-ah club leh ram tan match 17 a khelh aṭangin goal 19 zet a khung thei.

Bayern Munich hian a zawnin season 14 chhung chu Champions League group stage an paltlang ta a, kuminah hian tun hnai season thum chhunga an kal pelh theih loh semifinal paltlang turin Italian manager kaihhruaina hnuaiah hma an la mek - match hnih khelh tur an la neih turah an elpui Atletico Madrid an la mikhual dawn a, group hmahruaitu ni thei turin hnehna chan a ṭul ang.

Bayern Munich coach Ancelotti chuan a naute a siksawi thu sawiin, "Khelmual zira tlan tur player
ṭha kan nei a, minute 64 hnuah Kingsley Coman leh Douglas Costa te ka luhtir. Anni pahnih khan inkhel kalhmang ti danglamin Lewandowski khan goal khung turin hun ṭha a neih phah, kan thil tumah kan hlawhtling," tiin a sawi.

Inkhel dang

Group B-ah team lian bik an la awm thei rih lo a, Italian club Napoli leh Turkish club Besiktas te 1-1 in an inhnehtawk a, Benfica chuan Saviola goal khat hmanga Dynamo Kiev hnehin table-ah pahnihna an ni ve bawk. An group aṭang hian last 16 lut chiang an la awm lo a, hmahruitu Napoli (7 points), Benfica (7) leh Besiktas (6) ten beisei an la nei vek - match li khelh aṭanga point khat hmutu Dynamo Kiev erawh knock out round lut turin beisei a awm tawh lo.