Ni 85 hnuah Inter boss De Boer an ban

Inter Milan chuan an manager Frank de Boer chu ni 85 chhung chauh an hnenah a cham hman tihin an ban.

Dutch manager enkawlna hnuaiah Italian club hi Serie A-ah 12-na an ni mek a, Pathiannia Samp-doria laka 0-1 a an tlawm hnu-ah Inter hotu ten Ajax boss hlui hi chhawr zui zel tlakah an ngai ta lo a ni.

Netherlands international hlui De Boer hian Inter a zawm hma hian Ajax chu Dutch league-ah season li chhung a zawnin a champion pui a, Italian club a zawm hma season-ah erawh PSV Eindhoven ngam loin pahnihna an ni thung. An ram lama a record ropui tak avang hian De Boer hi nipui transfer-ah khan Everton leh Southampton pawn lakluh tumin an lo dawr tawh.

Kum 46-a upa manager chuan, "Kan tum ram thleng tur chuan hun tam zawk ka mamawh a ni," tiin Inter hotute chu an dawhthei tawk loah a ngai a, Inter fan-te hnenah an ṭawiawmna avangin lawmthu a sawi bawk. Barcelona defender ropui ṭhin hian August-a Milan khaw club a zawm dawn khan kum thum daih contract a ziak a, a tawpah chuan ni 85 bak a daih ta chuang lo a ni.

Inter Milan hian zanin dar 1:35-ah Europa League group stage khel turin Southampton an lenchilh dawn a, youth team coach Stefano Vecchi chuan manager lailawk hna a chelh ang. Inter hian kum 2010-a Jose Mourinho an chan hnuah manager pariat an nei tawh a, Portuguese manager hnuaia treble champion an nih hnuah Serie A nomawi an chawi leh tawh lo.