Fenerbahce khelmualah chak mamawh United

Manchester United-in an match hnuhnung berah Burnley lakah vawi 38 zet shot neiin goal an khung thei lo a, Premier League table-ah pariatna dinhmun luah mekin a chung ber Manchester City an phak lohna chu point nga a ni.

Zanin dar 11:30-ah United-in Europa League stage group match khel turin Turkish club
ṭha Fenerbahce an lenchilh dawn a, Old Trafford-a 4-1 a an lo sawp tawh team lak-ah United-in goal khunga inrin-tawkna neihlet ngei an tum ang.

United dinhmun

Manchester United tan Turkish club laka hnehna chan a pawimawh dawn. Red Devils hian khualmualah hnehna an chan a, group match inkhel dangah Feyenoord-in Zorya Luhansk an hneh loh bawk chuan table chung berah United an awm thei ang. Zanin bak match hnih dang khelh tur la nei United leh Feyenoord hian vawi thum khelhah point ruk ve ve an hmu a, Dutch club hi goal difference-ah sang zawkin Group A hmahruaitu an ni mek.

Inlan tur

United tan defender pahnih Eric Bailly leh Antonio Valencia chu hliam vangin an la inlan thei dawn lo a, United match hnuhnung pahniha inlan lo Chris Smalling leh Anthony Martial dinhmun a chiang lo bawk. United captain Wayne Rooney chu record siam thei dinhmunah a ding mek. English striker hian Europe-ah United tan goal 37 khung tawhin Red Devils tan Europe-a goal khung tam lama a tluk loh awmmchu Ruud van Nistelrooy chu goal khat chiahin a phak lo tawh - Turkish club lakah record siam ngei a tum ang.

Mualneitu lam

Fenerbahce lamin an player chhawr ṭhan zingah inhliam an nei lo a, ṭum dang ang bawkin Robin Van Persie chu innghahna tur a ni leh ang. Dutch striker hian Old Trafford-a goal khat a khung hnuah kartawp khan Turkish Super Lig-a Karabukspor 5-0 a an hnehna inkhelah goal hnih a khung leh tawh a, United tlarhnung tan ven uluk a ṭul ang. Turkish club hian Dick Advocaat enkawlna hnuaiah September thla hnu khan league match-ah tlawm hmel an hmu leh tawh lo a, Istanbul-a United an mikhualna hnuhnung berah 3-0 a an chak bawk avangin inrintawkna nasa tak nen Jose Mourinho-a naute hi an lo mikhual ang.

Mourinho thubuai

Manchester United manager Jose Mourinho chu kar khat chhunga a vawi hnih nan Foot-ball Association chuan thubuai an siamsak. Portuguese manager hi Liverpool nen an inkhelh hmaa referee Anthony Taylor chungchanga ṭawngkam a neih avangin hrem a lo ni tawh a, Burnley nen an inhnehtawk
ṭuma a chet dan mawi lo avangin referee Mark Clattenburg chuan technical area-ah a awm phal loin a hnawtchhuak. Mourinho hi match official laka ṭawngkam mawi lo hmangah puh a ni a, Zirtawpni thleng a thubuai hi khinletna hun a nei ang.