Raonic a chak nuamsa

Association of Ten-nis Professionals (ATP) season kal meka tour-nament hnuhnung ber dawt Paris Masters khelh mekah seeded palina Milos Raonic chuan a match hmasa berah vawi 17 zet aces siamin Spanish star Pablo Carreno Busta chu 7-6 (5), 6-4 in a hneh.

Wimbledon finalist Raonic hi a ke rek dinglam na vangin China Open semifinal aṭangin a inhnukdawk a, hemi hnuah Shanghai Masters leh Swiss Indoors-ah te beisei phak loin a tla hma hle, tunah erawh a theihna sanzia a pho lang leh ta.

Canadian Raonic chuan, "Ka hliam a dam tawh a, inhliam leh hlauhthawn thuah erawh chuan ka la indim hle. A vawi thum nan Carreno Busta ka hneh thei hi ka lawm a, ka service ṭha ka neih let leh tak bawk avangin ṭha taka season khar turin beiseina ka nei sang hle," tiin a sawi.

Inkhel dangah seeded pasarihna Tomas Berdych chuan Joao Sousa lakah fiahna hmasa paltlangin 6-3, 3-6, 7-5 in hnehna a chang. Seeded 12-na Ri-chard Gasquet leh France tlangval Grigor Dimitrov te pawhin an khingpui ve ve hnehin third round an lut ve bawk.