FIFA-in England leh Scotland dilna hnawl

Football khawvela thuneitu sang ber FIFA chuan England leh Scotland-in November 11-a World Cup qualifier an khelh huna pangpar (poppy) chuanna armband hren an dilna chu an hnawl.

November 11 hi Armistice Day a ni a, he ni hi Indopui pakhatna tawp dawna ṭangrual pawl leh Germany ten inremna an ziah champha a ni. He niah tak an in-khelh dawn avangin English leh Scottish Football Association te chuan Indopuinaa nunna chan sipai-te hriatreng nan pangpar (poppy) chuanna armband hren hi an duh a ni.

SFA hotupa Stewart Regan chuan politics, sakhua leh sumdawnna lam hawi zawnga thuchah lantir phal lohna dan neitu FIFA chuan an dan tlawhchhanin an dilna chu an hnawl thu a sawi a, hetihrual hian pawl pahnih chuan FIFA thutlukna hi suttir leh theih an inbeisei thu an sawi thung.

United Kingdom Commons' Culture, Media and Sport select com-mittee chairman Damian Collins chuan FIFA president Gianni In-fantino hnenah an thutlukna hi ngaihtuah nawn turin a ngen tawh. Hetihlai hian Britain ram chhunga mi Wales chuan November 12-a Serbia nen an inhmachhawn hunah poppy armband hren hi an dil ve mek bawk.

England, Scotland leh Wales football hruaitute chuan poppy armband hi hreng ta se eng ang hremna nge an tawrh dawn tih FIFA hnenah an zawt mek bawk a, point paih zawnga hrem an ni dawn lo a nih chuan dan palzuta armband hren tho an tum niin a lang.

Scottish FA hotupa Regan chuan FA chief executive Martin Glenn nen vawiin hian FIFA hruaitute an hmuh tur thu a sawi a, England leh Scotland mipuite duh pe tura FIFA an nawr tur thu sawiin, "Indopui laia kan ram tana nunna chante hriatreng nana kan tih theih tawk tih ve hi kan duh a, hei hi FIFA ngaihdana politics a nihna ai mah chuan mimal duhthlanna a nihna hi a sang zawk a ni," tiin a sawi.