Dinthar-in Cho an nei Zo United an cho

Coach atana Lalhlupuia Sailo an lak hnuah Dinthar FC an phûr a, Nigerian player pahnih duhtawk loin loan hmangin Cho Tsering Lepcha an lalut leh ta bawk. Sikkimese striker Cho hian vawiin tlai dar 3:00 hian Lammualah a club hlui Zo United a hmachhawn nghal ang.

Mizoram Premier League ṭan hnuah tun season hi transfer boruak san ber
ṭuma ngaih a ni. Hun rei zawk table mawnga awm Dinthar FC hian tuna an squad hi season tiah khan nei ngat se champion rinkai an ni pha ngei ang.

Chutihrualin Lalhlua hote hian Zo United hi an hneh lo a nih chuan table mawngphaha tla nghal thei an n. Point thum an hmuh erawh chuan palinaa awm Aizawl FC an phak lohna chu point hnih chauh a ni tawh dawn.

Transfer nghawng

Zo United-in coach thar Remlalthla-muanpuia (Sabito) hnuaiah match hnih khel tawhin Chanmari FC leh Chhinga Veng FC te an hneh lo. Transfer laiin an player pawimawh Laldinliana Varte chu Bethlehem Vengthlang lamah an chhuah zui bawk.

Round 7 zawha pangana Zo United hi pariatnaah awm tawhin semifinal lam aiin relegate pumpelh an tum a ngai ta - an chak chhoh erawh chuan semi final an la ban phak reng.

Sabito hote hian forward ṭha T. Lalnunpuia (Boihpuia), goalkeeper H. Lalrinkima, winger Alan Lalruatfela leh midfielder Lalngaihawma te an ziak lut a, amaherawhchu Boihpuia hi document la fel lo avangin an chhawr thei dawn lo. A lan dan mai chuan transfer hma aiin khar hnuah Zo United hi an ṭha lo zawk.

Zo United technical director James Khamliansawma chuan, "Tun din-hmunah chuan Dinthar hi tum an châk-awm lo. Chutihrualin Champhaia kan khelh dante thlir chuan chak phu zawk kan ni a, tun ṭumah pawh hian kan chak theih ka beisei. Kan dinhmun thlirin draw game khel thei kan ni tawh lo a, point thum hmuh ngei tumin kan khel ang," tiin Champhaia 2-2 a an inhnehtawk danah an vanduai thu a sawi.

Dinthar an thar

Dinthar FC an che ṭha tih lanna chu an result avangin MPL table chunglam a danglam. Bethlehem Vengthlang an hneh ṭumin midfielder Clarence Carter Ezebube a khel ṭha a, BVT chu pahnihnaah an awm phah.

Hemi hnu hian Lalhlua hote hi Chanmari FC nen an inhnehtawk leh a, defender Balogun Hammed a khel
ṭha hle. He result avangin hian Chanmari FC chu pahnihna an nih phaha, BVT-in hma an hruai leh phah bawk.

Dinthar chet ṭhat chhan hi foreigner chauh a ni lo a, goal nga khung tawhtu Michael Lalremruata bakah a kawppui Lalruatpuia te an khingpui tlarhnung tan an hnawksak hle. Tunah chuan Dinthar FC-in MPL-a goal ruk khung tawh Cho Tsering Lepcha an lalut a, an goal nawr a na lehzual ang.

Dinthar FC coach Lalhlupuia Sailo chuan, "Eng team mah kan ngainep lo a, an ṭha vek tih kan pawm. Tuna kan inlak ṭhat ve deuh hnuah pawh hian team lian zawkte hi chu squad chhah lamah kan la tluk chuang lo. Keini tan chuan chak chiang sa a awm lo a, semifinal sawi rik pawh ka duh lo. Kan duh chu Zo United laka point thum hmuh a ni a, chumi tur chuan theihtawp kan chhuah ang," a ti. Dinthar boss hian an player thar Cho-a'n training vawi khat chiah la chhim mah se inkhel nghal thei tura a fitness a
ṭhat tawk thu Vanglaini palai a hrilh bawk.