Zanin dar 7:00-ah Chhinga Veng Vs Ramhlun North

Chhangphut Field-ah Ram-hlun North FC-in anmahni ang bawka Mizoram Premier League kaithar Chhinga Veng FC chu 3-2 in an lehthal a, Champhaia inkhel en tura zin Ramhlun North ṭantute thusawi 'Chhinga Veng-in min hneh ngai lo' tih chu a thleng dik.

Zanin dar 7:00 hian Lammual-ah Chhinga Veng leh Ramhlun North te an inhmachhawn leh dawn a, inkhel pawimawh bik a ni. MPL kaithar pahniha chak zawk hi chuan semifinal beiseina an nei thar dawn a, chak lo zawk erawh tla thei dinhmunah an ding ang.

Hu Hu Hu

Chhinga Vengin season ṭan-tirh-ah Chanmari West hnehin Chhingcows-in phur takin 'Chhinga Veng - nuam nuam nuam' tiin an au rual. Khami hnua Chhinga Veng ṭantuten phur taka 'nuam nuam nuam' an tih leh hmasak ber chu an match hnuhnung ber kha a ni a, Zo United an hneh kha tun season-a an vawi hnih chakna chauh a ni.

Ramhlun North erawh MPL5-a vawi thum an chak tawh bakah Chhinga Veng laka an la tlawm ngai loh avangin MPL kaithar pahnih ṭantu zinga dinhmun
ṭha zawkah an chhal theih. Hei vang tak hian Ramhlun North
ṭantuten an au hla 'Hu Hu Hu' ring takin an auh chhuah puiin a rinawm a, Chhinga Veng ṭantute an ngawi mai mai lo ang.

Francis vs Emma

Onyeama Francis Oke-chu-kinu-a'n Ramhlun North tana a inlan hmasak berah champion lai Aizawl FC lakah chakna goal a khung nghal a, Nigerian forward hi palian tiha sawi tur ni lo mah se chakpui tham tih a chiang.

Chhinga Vengin Emma Chigo--zie an kawl thung a, Nigerian defender hi Zo United (3-0) laka goal an chhuah lohna kawngah a khel ṭha hle. MPL best defender pawh lo ni tawh Emma leh Fran-cis-te inhmachhawn tur hi a hmuhnawm khawp ang.

An phur lai

Chhinga Vengin point thum hlawh chhuak turin Zo United lakah goal thum an khung a, goal an chhuah lo. Coach Chawng-thansanga hrem vangin technical area-ah la awm thei lo mah se mipui ṭhutna aṭangin Chanmari West coach hlui hian a naute a la fuih ṭha a, bench-a ṭhu coaching staff dang nen an inbe pawp ṭha bawk.

Chawnga hian inhliam vangin Lalkhawpuimawia chhawr thei lo mah se forward MS Dawngliana inkhel turin a inpeih leh tawh a, H. Lalmuankima 'tak tak' kan hmu leh tawh bawk. MPL ṭan hmaa hming langsar ni lo, Zo United lama goal hnih khungtu Vanlallawma hming sawi hmaih a thiang lo.

Chhinga Veng boss Chawng-thansanga chuan, "Kan chak loh char char chuan kan relegate ang a, kan chak char char chuan semifinal lut thei kan la ni. Kan hmalam hun kan kutah eng emaw chen chu a la awm a, chuvangin kan theihna zawng zawnga kan khelh zel a ṭul a ni," tiin Vanglaini palai a hrilh.

Chawnga hian Chhinga Veng mipui ṭawiawmna an mamawh thu a sawi tel a, an chet chhiat ber lai pawha an hnunga an din tlat avangin an chungah lawmthu a sawi tel bawk.

Ramhlun North-in MPL match riat an khelh thlengin neih loh an nei a, tunah chuan an khingpuite buaipui tham striker an nei tawh a, an squad a inkhai rual ta chiah bawk. Nigerian forward Francis-a awm hnuah midfielder Zosangliana (Chhaia) a ṭha sawt a, winger thar Isaac Lalruatpuia leh Jerry F. Zonunsanga-te an hlauhawm sawt bawk.

Inhliam vanga phase 2-a la inlan lo forward Vanlal-thlamuana a rawn kir tawh dawn a, zanin inkhel a hmuhnawm sawt ang.

Ramhlun North coach Lalruatliana Sailo chuan, "Aizawl FC hneh thei kan nih avangin kan inchhuang ve hle. Kan khingpui tur Chhinga Veng hian player tawnhriat nei kawlin ṭawiawmtu mipui nei ṭha mah se ani aia pressure kan neih tlem avangin kan dinhmun a ṭha zawkah ka ngai. Player lak belh nana sum kan sen chhan hi thlen san kan duh vang a ni a, chuvangin chak tumin kan khel ang," tiin a sawi.

Ramhlun North hi an chak chuan Aizawl FC nen head to head (away goal rule) a an ṭhat zawk avangin table-ah palinaah an invawrh chho ang.

Ramhlun North boss Tawia chuan sawi chhunzawmin, "Kan hmalam hun hril thei inkhel pawimawh tak hi zanah khelh a ni dawn a, Ramhlun North mipui pawh ṭum dang aia tam min
ṭawiawm turin ka sawm a, anni hi kan chakna hnar an ni," tiin mipui ṭawiawmna a mamawh thu a sawi lang.