German striker ropui Klose a chawl ta

World Cup-a goal khung hnem ber dinhmun luahtu Miroslav Klose chuan Thawh-lehni khan inkhelh a chawlhsan thu a puang a, Germany national team coaching staff a zawm nghal bawk. Kum 38-a upa Klose hian season hmasa khan Italian club Lazio-a a contract hmang zoin club nei loin a awm reng a, inkhelh chawlhsan a thlang ta a ni.

Bayern Munich striker hlui hian club lama a hlawh-tlinna aimahin ram tana a chet ṭhatna a larpui zawk. Germany tan vawi 137 inlan theiin goal 71 a khung a, an ram chanchina goal khung hnem ber a ni. World Cup vawi li khelin a hniam berah semfinal a thlenpui vek a, kum 2002 leh 2006 World Cup khan All-Star team-ah a lang phak hial. World Cup 2014-a Germany an champion ṭum khan Brazilian striker ropui Ronaldo record goal 15 khumin a goal 16-na a khung a, World Cup chanchina goal khung hnem ber niin ram tana inkhelh a chawlhsan nghal bawk.

Kum 2006 World Cup top scorer Klose chuan, "Footballer nichunga ka hun tawn ropui ber chu Germany jersey nen ka tawng a, kan ram team enkawltu zinga tel tura thutlukna ka siam chhan pawh hei hi a ni," tiin a sawi.

Kaiserslautern-a bul ṭantu striker hian Bayern-ah season li hun a hman chhungin Bundesliga (2), German Cup (2), German League Cup (1) leh German Super Cup (1) nomawi a chawi a, Lazio-ah season nga chhungin Italian Cup vawi khat a chawi bawk.

Klose hian 2005-06 ah khan club lama a season ṭha ber hmangin Werder Bremen tan inelna hrang hrangah goal 31 a khung a, Bundesliga-ah goal 25 khunga top scorer niin German Footballer of the Year atan thlan a ni bawk.