City-in Pep Guardiola an hre ta

Manchester City tan an coach thar Pep Guardiola chungah rinhleh tur a awm tawh lo, Thawhlehni zan khan City-in Spanish manager hoin an club history-a a vawi khat nan Barcelona 3-1 in an hneh. Pep hian a club hlui Barca a ngam avang­in English club hi Catalan club chungah an awm tihna a la ni lo a, amaherawhchu City hian khawvel club ṭha berte zinga tel pha turin ke an pen tih a chiang a ni.

Kumin Champions League group stage inkhel ngaihven hlawh bikah Barcelona-in Lionel Messi hmangin minute 21-naah hma an hruai a, Argentine forward-in goal a khung theih nan Neymar-a'n a thawh hlawk a, Catalan club-in coun­ter attack an hmang ṭangkai hle.

Darkar chanve chuang hret Bar­celona-in inkhel an thunun hnu­ah City an tho a, minute 39-na­ah Sergi Roberto pass sual chu Sergio Aguero-a'n chang hmasa berin Argentine forward pass chu Raheem Sterling-a'n Ilkay Gundogan tan pe lehin Germany international midfielder hian awlsam takin a khung.

Second half-ah City-in an mi­khual ang thoin counter attack an hmang thiam tih lantirin minute 74-naah Kevin de Bruyne, Jesus Navas leh Sergio Aguero te hmanga Barca tlarhnung an ṭhiah darh hnuah Gundogan-a'n a goal hnihna a khung. Hemi hma hian Belgian midfielder De Bruyne chuan freekick aṭangin a khung bawk a, chak phu zawk City 3-1 in an chak.

Group C inkhel dangah Borus­sia Monchengladbach leh Celtic te 1-1 in an inhnehtawk a, club paliten beisei tur la nei vek mah se City leh Barcelona te knockout stage lut turin an dinhmun a ṭha tawh hle.

Eng nge an sawi?

Manchester City manager Pep Guardiola chuan, "Minute 30 chhung ṭha takin an khel a, harsatna pawh kan tawk nasa hle. Amaherawhchu goal kan khung hnuah kan insiam-
ṭha a, second half-ah vawi tam tak counter attack hmanga kan chhut let theih avangin ka lawm hle a ni. Tun hi hmasawnna duhawm bik a ni a, rahbi thar kan kai a ni. Team ṭha tak kan khing tawk a, tunah chuan ka player-te pawhin 'Barca hnehtu an ni' tih an inhre reng tawh ang," tiin an hnehna chu point thum bakah player-te rilru put hmang thlak thei a nih thu a sawi.

Barcelona manager Luis Enrique chuan, "Minute 40 chhung kan khelh ṭhat ber te zinga mi a ni hial ang. Kan tihsual vanga goal kan khung hnuah khan ngai kan awh leh tawh lo a, ho te te a tihsual kan neih avangin inkhel kan thunun ṭha thei lo a ni," tiin tihsual vanga inkhel a danglam thu a sawi.

City-in season bul an ṭan ṭhat khan Pep Guardiola ṭhat zia an hre ṭan a, amaherawhchu a zawna vawi ruk chhung chak hmel an hmuh loh bakah Nou Camp-a 4-0 zeta an tlawm avangin Spanish manager hi coach ṭha satliah ve maia ngaihna a awm hman. Tunah erawh City-in an mualah Barca an chiang takin an hneh a, club neitu Arab mi hausa suangtuahna a thleng dik chho ṭan. Pep Guardiola an hriat chian chinah chuan City neitute pawhin Spanish manager an chang thei hlauh hi a lawm khawp ang.