Kanan FC-in training a ṭan

Mizoram Premier club thar Kanan FC-in coach Chawngthansanga hoin nimin zing khan RG Stadium-ah training an ṭan a, MPL12-ah result ṭha neih ngei an tum. Kanan enkawltu Chawnga hian Reitlang FC chu MPL khel turin a tlinpui tawh a, Chanmari West FC leh Chanmari FC te a enkawl tawh bawk.

Kanan FC-in Chawnga chunga rinna an nghat a, MPL khelh tumin Aizawl DFA hnuai First Division-ah theihtawp an chhuah ṭhin mah se an tum ram an thleng lawk lo. Tunah erawh Kanan FC hun a inher chhuak ve ta a, MPL12 Playoff-ah Chawnpui FC hnehin Mizoram chhunga football inelna sang ber an khel dawn.

Chawnga chuan, "Player kan la kim chiah lo a, chutihrualin a kal chinten bul kan ṭan ṭha hle. Club hruaitute an ṭang a, player pawh min lak ṭhatsak a, keini lamin result ṭha nei turin theihtawp kan chhuah ang," tiin Vanglaini a hrilh. Kanan FC hian Chawnga thawhpui turin Chawnpui FC leh Chanmari FC-a assistant coach hna chelh tawhtu T. Laltlantluanga an lalut bawk.

Kanan main sponsor hi Zawlbuk & Jawa Yezdi te an ni a, co sponsor-ah Lalruatkima Filling station, MD Corner leh Jimmy Construction Lalsangliani(Mami) te an awm. MPL club thar ni mah se club president Lalramnghaka Pautu (Anghaka) leh hruaitu dang inpekna zarah Mizo club kal mumal ber zinga mi an ni.

Mizoram Football Association chuan May 5, 2025 khan MPL12 ṭan hun tur hi an puang tawh a; July 17, Ninganiah khelh ṭan a ni dawn. Tun season-ah hian MPL11-a club pali Aizawl FC, Chanmari FC, Mizoram Police leh SYS FC bakah club thar pali MLS FC (Lawngtlai), Kanan FC, Dinthar FC leh Saikhamakawn FC te an inel dawn.