Chanmari FC-in CYMA Football best player an la

I League club Chanmari FC chuan CYMA Football 2025-a best player Lalnunzira chu season thar atan contract an ziahpui a, Zirtea bakah hian Republic Veng champion-na kawnga defender pawimawh Laltluangliana an lalut bawk.

CYMA Football-ah Zirtea hi Republic Veng captain niin team innghahna a ni a, minute zawng zawng a khel vek a, goal li a khung. Season hman zawh takah khan Zirtea hian Chanmari FC tan MPL11-ah inlan mah se I League 2-ah a tel tawh lo thung.

Republic Veng tlangval hian Chanmari FC a zawm hmain Chhinga Veng tan a khel tawh a, I Day Football 2023-ah khan champion puiin best player-a thlan a ni tawh bawk.

Chanmari FC hian Republic Veng tlarhnung innghahna Laltluangliana an lalut bawk a, Tluangliana hi Lalsangzuala Hmar hoa Santosh Trophy-a Mizoramin pathumna an nih ṭum khan telin Santosh Trophy hnuhnung bera B. Malsawmzuala'n a hruai ṭum pawh khan a tel. Tluangliana hi right back ni mah se centre back leh left back-ah chhawr tel theih a niha vangin team tan a ṭangkai khawp ang.

I League club hian midfielder Joel Ramengmawia chu kum 2027 thleng contract an ziahpui. SYS FC chhuak midfielder Joel hi Swami Vivekananda Men’s U-20 National Football Championship-ah khan Mizoram innghahna a ni a, Lalrindika Hmar kaihhruaina hnuaiah Mizoram U20 team chu pahnihna an ni.