AFC A Licence coach thar R-a

Aizawl FC assistant coach R. Lalruatfela chuan AFC A Licence a nei thar a, Mizo zingah A Licence nei thei coach parukana a ni. Kolasib tlangval R-a hian instructor course a zo tawh a, ama kaihhruaina hnuaiah tluang takin AIFF D Licence Course ṭum khat tluang takin a zo tawh a, tunah hian a ṭum hnihna atan Serchhip-ah a kalpui leh mek.

A Licence nei thar R-a chuan, "Pathian kaihhruaina zarah A Licence ka nei thei hi ka lawm a, mahnia club enkawl lam rilruah a la lang lo. I League-a a tam thei ang ber tawnhriat neih ka duh," tiin I League club tana assistant coach nih zel a la thlan thu Vanglaini a hrilh.

Nikum September thla khan module 1-ah Bangalore-ah neih a ni a, module 2 pawh Bangalore-ah tho neih niin nikum December thla khan neih a ni. Course instructor te hi Thomas Joseph leh Narayana Menon te an ni a, kumin January thla khan result chhuakin R-a hian practical exam tih nawn a mamawh.

Kumin May 26 khan Hooghly, West Bengal-ah instructor Shakti Chauhan kaihhruaina hnuaiah practical exam hi a nei ṭha leh a, nimin khan result chhuakin kum 28 mi chauh niin A Licence a nei thar a, a thiamna hi Mizoram football tan a pawimawh khawp ang.

AFC Licence hian I League-ah head coach hna an thawh theih bakah ISL leh National team-ah assistant coach hna an thawk thei a, R-a bik hian instructor course a kal tawh avangin AFC C Licence Course ṭum hnih a 'assist' chuan C Licence Course instructor a ni thei bawk ang.

Mizo zinga A Licence coach te chu Danny Lalduhawma (Aizawl Venglai), K. Lalrindika (Mission Vengthlang), Lalruatliana Sailo (Vaivakawn), Victor Lalbiakmawia (Mission Vengthlang), Stephan Tawnthansanga (Muthi) bakah R-a (Kolasib) te an ni.