Spurs-in Thomas Frank lak an tum

Tottenham Hotspur chuan an coach Ange Postecoglou an ban hnuah, a hmun ruak luah tur coach zawn hna an ṭan lehnghal a, Brentford head coach Thomas Frank chu lakluh tumin Premier League club hi inbiakna an neihpui.

Kum 51 mi Frank hian Brentford-ah hian kum 2027 thleng cham turin contract a nei a, Spurs hian an la lut dawn a nih chuan pound maktaduai 10 tal an sen a ngai dawn.

Hei hi a tlem thei ang bera chhut a ni a, Frank hian coaching staff a chhawm tel tam dan a zirin, Spurs hian Brentford hnenah hian pawisa an pek belh nual a ngai bawk ang.

Spurs hian Zirtawpni zan khan coach Postecoglou an ban thu an puang a, Australian coach hoa Europa League champion an nih aṭangin ni 16 chiah a liam hman!

London club hian season tharah Champions League khel dawn mah se, Premier League-ah match 38 aṭangin match 22-ah an tlawm a, table-ah 17-na an ni. Hei vang hian kum 17 hnua nomawi chawipui leh hmasa bertu coach Postecoglou an ban.

Celtic pawh lo kaihruai tawh Postecoglou aiawh tura an biak mek Frank hian kum 2018 aṭang khan Brentford hi enkawl ṭanin, kum 2021 khan Championship playoff final-ah hnehna chanpuiin, Premier League a hruai thleng.

Premier League-a budget tlem ber pawl ni chungin Brentford hi EPL club vantlangah a siam thei a, fak a hlawh hle. Season hman zawh takah khan league-ah 10-na an ni a, Spurs aiin point 18-in an hmu tam zawk.

Tottenham hian coach chauh an thlak dawn lo a, an insingsa nual. Chief football officer Scott Munn chu tun karah chuan chhuak hman tura beisei a ni a, ani hi Postecoglou lakluh theih nan a thawhhlawk hle.

Arsenal-a thawk ṭhin, Vinai Venkatesham chu Chief Executive Officer thar a ni a, executive director Donna Cullen chuan club a chhuahsan thung. Spurs hian FIFA hrem vanga chawl mek, club managing director of football hlui Fabio Paratici pawh July thlaa a hremna a hman zawh hnuah lakluh leh an tum nia sawi a ni.