City-in Ait-Nouri an la lut

Manchester City chuan Wolverhampton Wanderers left back Rayan Ait-Nouri chu pound maktaduai 31-in an la lut a, kum 24 mi hian kum 2030 thleng City tana khel turin contract a ziak.

Algeria international Ait-Nouri hian kum 2021 khan £14.9mtd-in Angers aṭangin Wolves hi a nghetin a zawm a, a hma season khat chu loan-in a lo khel tawh - Premier League-a tlangnel sa a nihna hi City tan a hlu ang.

Ait-Nouri hian season hman zawh takah khan Wolves tan inelna hrang hrangah match 41 a khel a, goal nga a khung bakah assist vawi sarih a nei a, Pep Guardiola hnuaiah hmasawn lehzual a beisei dawn.

Wolves hian tun nipuiah an player langsar pahnih an hralh ta a, Ait-Nouri hma hian Brazil striker Matheus Cunha chuan £62.5mtd-in Manchester United a zawm tawh bawk.

Ait-Nouri chuan, "City hi khawvela club lian ber pawl a ni a, hetiang ang club tana ka khel thei tur hi ka tan chuan duhthusam a ni.

"Pep Guardiola leh a coaching team te nen thawk ho a, ka inzir belh thei tur hi ka lawm a, world class player rual kianga ka inkhel thei tur hi vannei ka inti a ni," a ti.

City hian AC Milan aṭangin Netherlands midfielder Tijjani Reijnders chu £46.3mtd-in an la dawn a, Lyon aṭanga Rayan Cherki la lut turin inremna an nei tawh bawk - he thuziak i chhiar meuh chuan France international hi an tlangzarh tawh ang.

Cherki man tur hi £33.7mtd a ni a, kum 2030 thleng contract a ziak ang. Pep-a team hian third choice keeper turin Chelsea goalkeeper Marcus Bettinelli an dawr mek bawk.

City hian an third choice keeper Scott Carson chu a contract a hman zawh tawh avangin an chhuah zalen dawn a, season li zet Blues-a third choice ni tawh Bettinelli an dawr zui a ni.