Silly Point : Kumpinu ram lamah mit i len ang
English Premier League sawi ka tum lo a, Sap ram leh Welsh Mission lam chanchin ziah tum pawh ka ni hek lo. Rohit Sharma leh Virat Kohli te hun a lo inher liam hnu a, India team tharin England an tlawh tur thu leh 1890 kuma Kumpinu Sawrkarin he ka Zoram hmangaih an awpbeh ṭan aṭanga kum 135 a liam hnuah Mizoram tlangval pakhatin cricket hmanga Kumpuinu ram a zuk run dan thailan ka tum mai ka ni e.
A sakhming Jehu
A nu leh pa te damchhunga Lal Isua rawngbawl tura inpe an nih avangin, Bangaluru khawpuiah seilian, Dawrpui Vengthar tlangval Jehu Anderson chu tuilet hnuah Mizoram cricketer professional cricket khel tura, India ram pela, English County Cricket khel hmasa ber a ni a. Khel satliah, team member satliah mai ni loin, team innghahna, chakpuitu leh sap ram chanchinbu headlines luah thei khawpa Mizoram tlangval a khawsa hi a ropuina lai zawk chu a ni .
Nunkawng chhukchho
Mihring tungchoa kal tawh phawt hi chu, tu hringnun mah hi a marin, a tluang purh bik lo a, kan Lalpa Isua pawh a bang bik lo. Jehu Anderson hi a nu leh pa te rawngbawlna hmun Bangalore a nih avangin, a Mizo ṭhiante aiin a infiamna tuina ber cricket zirna hun leh hmun neih ṭhat zawnga chuan malsawmna a dawng ngei mai.
Mahse infiamna khawvelah chuan talent leh thiamna te hi a taka phochhuah thiam a pawimawh a. 2018 season aṭang khan Mizoram Under 23 player rinrawl ni ṭanin, kum 2022 season aṭang khan senior team (Ranji Player) ah rawn inhlangkaiin, hawi let ni a nei leh tawh ngai lo a ni.
Professional cricket ka chawlhsan hnu chiah hian a rawn lut ve chiah a, kan inkhelho hman lo a, amaherawhchu Mizoram lamah 1st Division cricket-ah kum li lai mai team khatah kan khelho a, khang hunlai aṭang khan rawlthar hmakhaw êng tak, keini a rual u te min rawn la chawlhtir tur a ni tih erawh ka hmulawk vek tawh.
A lungpui, a innghahna a pain kum 2021 khan chatuan ram a pansan a, luaithlinul chunga cricket khelh leh a ngai a, hetiang hunah tak hian player satliah leh mi bik danglamna a lo lang ṭhin reng a ni.
Jehu leh keimah
Professional cricket tak phei chu kan khelho hman lo a, a hminga club level ah kum li lai lo inhrawn leh u chan chang chu, Jehu-a hian mentor (kaihruaitu) leh a thu lakna berah min hmang der thiam ṭhin a. Tlang hriat lem loh hian a khat tawkin technical leh tactical thil te, psychological leh ka lo tawnhriat tawh aṭanga inzirna tur a hriatbelh duh te infah tawnin hun hi kan lo hmang duh fo a.
Tun ṭum England a thlawhthlak hma pawh hian kan chenna inah minlo lenchilhin chawhma pum hun kan hmang dun nghe nghe a, a hlawkpui leh hlawkpui loh chu ka sawi theih a awm lo, mahse keimah - a mentor tur zawk ni si hi ka finbelh phah sawt zel tih erawh ka sawi thei.
I rah chin apiang Mizoram
Kum 2022/23 Ranji Trophy season-ah, Nadiad khelmualah Bihar laka century a siam tuma, tap mittui nen van lam thlira a pa tana a hlan tum te kha hmanni lawk emaw kan tih chhungin, he Dawrpui Vengthar tlangval hian ram a zuk la ta duai duai mai. Tunah hian half century vawi li leh century hnih a khelhna County Wellingborough tan a vaw chhuak tawh a ni.
May 31, 2025- a Lodington & Mawsley an tum ṭuma 116 runs a vuak chhuah phei kha chu a hmuna awmte sawi hian khaikhawm mai ang, "Innings of the highest Quality" an ti hial. A khel ṭha ngang aniang chu. County Cricket All Star game, a ṭha thlanchhuah zingah Rest of The World 11-ah hmun changphain, kar liam ta khan Southern Hemisphere 11 (Australia & New Zealand aṭanga thlankhawm) an intum nghe nghe a nih kha. Jehu kal zel teh khai...
Karleh maia ṭan tur India cricket team England tlawh 2025 erawh a lehpek atan ka khek ta mai e.