Manchester City midfielder thar Cherki

Manchester City chuan attacking midfielder Rayan Cherki an lalut - Lyon aṭanga Cherki lalut tur hian pound maktaduai 30.45 an sang a, kum nga chhung atan inremna an ziah pui a ni.

Kum 21 mi Cherki hian Manchester City tan Club World Cup a khel thei nghal dawn. Inelna hi June 14 aṭangin United States-ah khelh a ni dawn - Premier League season tirah chuan a inpeih hman hle dawn niin a lang.

Lyon tana match 200 khel tling tawh Cherki chuan, "Manchester City zawm theihna remchang neih chu a lawmawm, hetiang hun ṭha nei tur hian hun rei tak chhung chu rim takin ka lo bei tawh ṭhin a ni.

"Football khelh hi nuam ka ti a, chumi rual chiah chuan hmasawn ka duh bakah hlawhtlinna chan ka chak. Chutiang tur atan chuan Manchester City hi ka tan hman duhthusam a niah ka ngai," tiin Etihad Stadium a pan thei chu a lawm hle.

Real Madrid, Liverpool, Manchester United leh Chelsea te nen pawha an lo sawi zawm tawh Cherki hi khawi laiah tak nge a khelh ang tih chu zawhna lian tak a ni, a chingfel tur chu Pep Guardiola a ni ang.

Man City hian Guardiola an neih china season an hman chhiat ber ṭum an tawng zo chiah a, indinthar leh an tum mek. Kevin de Bruyne a chhuak dawn a, tlarhma kama Erling Haaland thlawp thei tura ngaih a ni.

Nipui bazar chhungin Man City hian AC Milan aṭangin Netherlands midfielder Tijjani Reijnders an lalut tawh bawk a, pound maktaduai 46.5-in an lei fel, ani bakah hian Wolves left-back Rayan Ait-Nouri an la tawh bawk.

Reijnders chuan, "Manchester City hi khawvel club ṭha le ropui berte zinga mi a ni a, coah ṭha ber leh player ṭha rual mai bakah hmunhma a ṭha em em bawk. Pep Guardiola enkawlna hnuaiah hlawhtlinn a hrang hrang an chang tawh, kan chan chhunzawm theih pawh ka beisei," a ti.

Season hman zawh takah khan Reijnders hian AC Milan tan inelna hrang hrangah match 54 khelin goal 15 a khung a, Serie A midfielder of the season atan thlan niin theihna sang tak a nei tih a chiang a, hmabak eng tak a nei bawk.

Dutch international Reijnders hi midfield-ah chuan a chawr kual theih, hei vang hian Cherki hi Haaland hnung chiaha tlen tura ngaih a ni, season hmasa khan Ligue 1-ah assist vawi 11 a nei a, ṭhiante khung tur siamsak thiam mi a ni.

Manchester City director of football Hugo Viana chuan, "Pep-a kaihhruaina hnuaiah Cherki hi khawvela a ṭha berte zinga mi a ni thei ang, chutiang tur chuan theihna a nei a, kan ring ngam em em bawk a ni," tiin beisei an neih san thu a sawi.

City hian Chelsea aṭangin English goalkeeper Marcus Bettinelli an lalut bawk, a man zet erawh tarlan ni loin kum 2026 thleng daih inremna an ziak. Ederson thachhang dawltu veteran keeper Scott Carson a chhuah avangin Bettinelli hi an mamawh.