Argentina an tlawm lo

World Cup khel turin an tling chiang tawh - South America ram 10 inel zingah a sang ber an ni chiang tawh bawk. Mahse, Argentina an la intlahdah chuang lo, nimin zing khan Colombia nen 1-1 in an inhnehtawk.

Argentina hian goal an chuah hmasa, chumi hnuah Enzo Fernandez chuan Colombia midfielder lakah ke a lek sang lutuk a, minute 70-naah hnawhchhuah a ni, a tawp lam minute 20 chhung Argentina an kim lo, si an phur bawk.

Estadio Monumental hi Argentina khawpui Buenos Aires-a awm a ni. Mikhual Colombia tan Luis Diaz-a'n goal ropui a khung hmasa. Liverpool forward hian mual sir aṭanga ball a lakluh hnuah player pathum kar aṭangin a khung.

Lionel Messi leh a ṭhian ten chhanletna tur mai an nei lo. Player tlem zawk an nih chhunzawm hnuah phei chuan anmahni khawpuiah ngei tlawm thei dinhmunah an ding, mahse hun tawp hma deuhin Thiago Almada chuan player pahnih kapkara pet lut chungin siphurh a sut a, an mualpho tur a hliah.

Argentina coach Lionel Scaloni chuan, "Match kan khelh zawh apiang hian ennawn tur a awm ṭhin. Colombia pawh khan tun hma lama an la khelh ṭhan loh dan takin an rawn khel a, hmachhawn pawh an harsa kan ti tlang hle.

"Kan khingpuiten mual sir aṭanga na taka min nawr hian kan nghet tawk lo deuh ṭhin, kan insiamṭhatna lai tur pawh a ni," a ti. Scaloni hian inkhel zawh hmain Messi a la chhuak a, an captain hi an thlak ngai meuh loh avangin inkhelh banah a sawifiah.

Scaloni chuan, "A nihna takah chuan lakchhuah tum pawh ka ni lo, mahse player pahnih kan thlak hnu khan Leo hian amah pawh chhuak se la team tan a ṭhat zawk tur thu min hrilh a, rang takin ka thlak nghal a ni," tiin a sawi.