Grass-ah Raducanu a chak

Wimbledon inbuatsaih nan tournament an khel ṭan a, tun hnaia a nun a zalen tawk loh thu sawitu Emma Raducanu chuan Queen's Club Championship a khel a, nuamti taka inlan chungin Cristina Bucsa a hneh.

US Open champion hlui Raducanu hian tun hnai khan a chhungrilah hlauhna a neih thu a sawi a, result pawh a nei ṭha tawk lo. Tunah erawh boruak a danglam chho mek, a khingpui hi 6-1, 6-2 in a hneh a ni.

London chhim lama tournament hi grass court inelna zingah chuan an ngaihhlut a ni ṭhin. Raducanu chuan, "Thil dang ngaihtuah nei miah loa ka inkhelh theih hi chuan nuam ka ti a, service a dik chhunzawm phei hi chuan a fuh vek zel.

"Zalen leh engthawl taka hun hman hi ka mamawh chu a ni," a ti. A match lehpekah chuan Rebecca Sramkova a hmachhawn ang. Sramkova hian inkhel dangah Wimbledon champion lai Barbora Krejcikova chu 6-4, 6-3 in a lo hneh ve thung a ni.