Sporting-in Gyokeres hralh tlawm tum lo

Primeira Liga champion Sporting Lisbon chuan an striker Viktor Gyokeres chu tlawm taka hralh an tum lo a, player hi a duh huna chhuak tura a thuphunga inremna nei sa anga an sawi chu an pha.

Kum 27 mi Gyokeres hian Portuguese top flight league-ah season duhawm tak a hmang a, Portugal-ah season hnih a hman chhungin, match 102-ah goal 97 ngawt a khung thei.

Sweden international hi Manchester United leh Arsenal-in an duh nia sawi a ni a, a contract-ah hian pound maktaduai 85-a a chhuah theihna dan a inziak tel.

Hetihlai hian khawthlang media-te chuan, season hman zawh tak kha Sporting-a a cham avangin Gyokeres hi club thuneitute nen a thuphungin a chhuah theih danah inremna sa an nei angin an tarlang a, £59mtd-a chhuak thei angin an tarlang.

Tunlaia player man tozia ngaihtuahin, Gyokeres man hi ani ang player 'class' tan a to lo. Mahse, tun hnai khan club president Frederico Varandas a ṭawng chhuak a, an striker hi heti zat leka hralh an tum loh thu a sawi.

Varandas chuan, "Viktor Gyokeres hi £59mtd-in kan chhuahtir dawn lo - chutianga a chhuah theih thu chu engtik lai mahin ka tiam lo," a ti a, a striker hi a hralh dawn a nih pawhin hei aia tam zawk an phut dawn niin a lang.

Sporting President chuan dawrtu an la neih loh thu sawi zuiin, "Vawiin thleng Gyokeres lei tumin tuman min la dawr lo. Season hmasa a ni emaw, tunah emaw pawh ni se, min dawrtu an awm lo," a ti teh tlat!

Gyokeres hian tun dinhmun thleng tur hian zinkawng a zawh thui ve hle. A hunlaia Swedish second division club Brommapojkarna aṭanga a professional career zawh ṭanin, kum 2017 khan Brighton & Hove Albion a zawm.

Mahse, Brighton tan hian league match a khel miah lo a, inelna dangah match riat khelin goal khat a khung. German second division club FC St Pauli leh Championship club Swansea City leh Coventry City-ah te loan-in a khel.

Kum 2021 khan Coventry hi a ngheta zawmin, season hnih a khel hman a, tun hnai season hnih kha Sporting-ah a khel. Season hmasa khan, tuna Manchester City director of football Hugo Viana chu Sporting-ah hian Sporting Director-in a awm.

Khatihlai khan Gyokeres agent chuan Sporting hotute biain, a player duhtu an awm a, a chhuah theihna tur tihfel a duh. Varandas chuan, "Khatihlaia a agent buaina ber chu, a chhuah theihna tura kan sum phut zat tur kha a ni.

"Thil engemaw zat tihchian a duh a, mahse, kan inremna chu, 'Tun dinhmunah chuan release clause kan phut kher lo ang' tih kha a ni chauh. A agent khan a man tur zat tihfel sa a duh a, mahse, kum khat chhungin thil tam tak a thleng thei a, engmah tihfel a awm lo.

"Chiang taka ka sawi theih chu £85mtd pawh ka phut kher lo ang," a ti - a striker hi man tlawm taka chhuahtir a tum lo a, chutihrual chuan man to uchuak taka hralh pawh an tum chuang lo niin a lang.