Poland coach Probierz a bang

Robert Lewandowski a titau hlawhtling - coach Michal Probierz a bang ta! Lewy hian an ram team enkawltu chu Probierz a nih chhung chu Poland tana inlan a tum tawh loh thu a sawi a, he thu a sawi hnuah hian Poland hian match khat chiah an khel hman a, Probierz a bang zui.

Probierz hian Lewy hi a captain nihna hlihsakin, a aiah Inter Milan midfielder Piotr Zielinski chu captain-ah a ruat. Barcelona striker Lewy chuan hei hi a hrethiam lo a, "Probierz hian kan ram team a enkawl chhung chu Poland tan ka inlan tawh lo ang," a ti.

Poland hian World Cup qualifier an khel zui a, Finland lakah 2-1 in an tlawm. Match thum an khelhah point ruk hmuin, an group-ah pathumna an ni a, an chungah match hniha point ruk neitu Netherlands leh match lia point sarih neitu Finland an awm.

Probierz chuan, "Kan ram tana ṭha ber tur ngaihtuahin, ka ban hi ram tan a ṭha ber niah ka ngai a ni. Poland ka enkawl thei hi duhthusam thleng dik a ni a, ka nuna chawimawina ropui ber a ni," a ti.

Polish coach hian an ram team hi September 2023 aṭanga enkawl ṭanin, Euro 2024-ah a kaihruai a, an group-ah table mawngphah luahin, inelna aṭanga tla hma ber an ni. Match 21-a kaihhruaiah vawi kua hnehna chanpuiin, vawi nga draw an nei a, vawi sarih an tlawm.

Kum 52 mi coach chuan, "He hna ka chelh chhunga ka tawn footballer-te zawng zawng chungah lawmthu ka sawi. National team hi kan ram neih hlu, kan inṭawm a ni a, ka lo ṭan chhunzawm zel ang che u," a ti.

Probierz ber a ban takah chuan Lewy pawh Poland tan a lo kir leh thei tawh dawn tihna a ni a, ram tan match 158-ah goal 85 khungin, Poland tan ani aia khung hnem an awm lo.