Sane-a'n Galatasaray a zawm dawn

Bayern Munich forward Leroy Sane chuan Allianz Arena chhuahsanin Turkey lam a hawi a, Galatasaray a zawm dawn - he thuziak i chhiar meuh chuan an in la lut fel tawh hial ang.

Sane hian Ningani khan Istanbul a thleng a, Galatasaray lam pawhin an indawr thu an puangzar nghal. Ataturk Airport-ah Galatasaray scarf nen a inlar a, kum thum chhung Turkish club tan hian a khel dawn.

Kum 29 mi hian Bayern-ah a contract a hmang zo a, German champion hian cham turin an thlem. Sane hian cham a thlang vek tawh a, a thuphungin an inrem hman. Mahse, Galatasaray an lo lan hnuah a rilru a thlak thut!

Germany tan vawi 70 inlana goal 14 khungtu Sane hian a agent banin, agent lar Pini Zahavi a thawhpui zui a, Galatasaray nen an inrem dan chuan, kum khatah euro maktaduai 15 a hlawh dawn - Turkish football-ah ani aia hlawh hnem an awm dawn lo.

Fenerbahce player Allan Saint-Maximin chu Turkey-a player hlawh hnem ber a ni mek a, €11.7mtd a hlawh - Sane hian a khum dawn chiang hle.

Bayern chuan Sane hi kum khata €10mtd hlawh turin contract thar an zawrh a, Bundesliga-a khelh zel ai chuan Turkey-ah €5mtd vela hlawh tam zawk a thlang ta a ni ber.

Schalke academy chhuak, Manchester City tan pawha khel tawh Sane hian Bayern-ah kum nga khel tawhin, match 220-ah goal 61 leh assist 55 a nei a, coach Hansi Flick, Thomas Tuchel, Julian Nagelsmann leh Vincent Kompany te hrawnin, hmun pawimawh a chang thei vek.

Al Hilal, Arsenal leh Fenerbahce te pawhin an duh Sane hian Bayern tan Bundesliga nomawi pali a chawi hman a, City tana a khelh lai khan Premier League-ah vawi hnih nomawi a chawi hman bawk - Champions League-ah a la champion miah lo!