Chanmari FC-in an duh an la

I League khel turin Chanmari FC an inpettling a, Chanmarians hian champion team Republic Veng aṭangin best player Lalnunzira leh defender pawimawh Laltluangliana te an la lut nghal.

Zirtea hi MPL11-ah Chanmari tan khel mah se I League 2 khel tur zingah telh a ni lo a, best player a nih takah chuan season hman zawh takah thutlukna siam sualah inngaiin MPL12 atan an la lut. Republic Veng captain Zirtea'n CYMA Football zarah a hlutna a tisangah a ngaih theih bawk.

Republic Veng defender Tluangliana hi Chhinga Veng leh Chawnpui tan te a khel tawh a, Mizoram tan Santosh Trophy hnuhnung pahnihah a kal ve ve. Chanmari FC-in I League 2 khel tura an lakluh avangin National Games khel turah koh a ni lo a, mahse an squad a chhah deuha an hriat avangin CFC hian an chhuah leh thung.

Tluangliana hian CYMA Football-ah hming a chher a, Republic Vengin Chanmari 2-0 a an hneh ṭum pawhin a khel ṭha hle. Coach Lalsangzuala Hmarin Tluangliana theihna a hria a, centre back bakah wing back angin ding lam leh vei lama a khelh theih avangin a hlutna a sang a, Chanmari tan pawh a ṭangkai khawp ang.

Chanmari FC hian Sialhawk quarterfinal thlenpuitu Crespo Vanlahriatpuia leh Serchhip Vengchung last 16 hruai thlengtu captain Johny Lalrinchhana te an la lut bawk. Crespo hi Chanmari FC tan a khel tawh a, Gokulam Kerala leh Hyderabad FC reserve tan a khel tawh. Johny hian MPL-ah a tawnhriat a nei ṭha a, midfielder rorum hian I League club-ah chona thar a hmachhhawn dawn.

I League club hlun zawk Aizawl FC erawhin CYMA Football lam melh loin an academy player 10 ngawt chu senior team-ah an sawn chho. AFC player sawn chhohte hi PC Pazawna, C. Lalrinhlua, Laldawngzuala, Lalrinhlua, Alfred Lalrinpuia, Isak Lalvenhima, Lalhruaitluanga, C. Lalkhawngaiha, C. Lallawmawma leh Elisa Lalchamliana te an ni a, MPL-a bench mawitu ni ringawt lo a, team tana ṭangkai pha tura ngaih an ni.