BVT player-ten khawi lam nge an hawi?

CYMA Football-ah coach Lalbiaksanga Colney hnuaiah Bethlehem Vengthlang an hmuhnawm a, player pawh an nei ṭha. Chutihrualin an player zingah khelhna tur la tifel lo an awm nual.

Captain K. Lalṭhathanga (Puitea) leh PC Laldinpuia te chu Indian Super League lama la khel tur an ni a, goalkeeper Lalmuansanga leh defender K. Lalmalsawma (Buanga) te pawh I League lama kal an la tum.

Midfielder thawkrim Lalmuanpuia (Giroud) erawh Reliance Academy-a awm lai a nih avangin club a zawm hmain academy lamah kum khat a la awm dawn. Giroud-a kawppui Emmanuel Lalhruaizela bakah a ute pahnih goalkeeper Lallawmzuala leh winger Lalmuankima ten Saikhamakawn an zawm a, CYMA Football final-a an hneh loh Lalsangzuala Hmar hnuaiah an khel dawn.

Winger pahnih K. Lalramzauva leh Lalruatkima (RK-a), forward Lalrammawia bakah defender Hmingthanmawia leh Vanlalpeka Pautu te khelhna tur a la chiang lo bawk.