An mualah Pacers an chak

Nimin zing khan NBA Finals Game 3 khelh a ni a, mual neitu Indiana Pacers chuan an mikhual Oklahoma City Thunder chu 116-107 in an hneh a, best of seven series khelh turah 2-1 in hma an hruai mek.

Gainbridge Fieldhouse-a inkhelah Pacers tan Tyrese Haliburton chu an chakna hnar a ni, ani hian point 22 a hmuh bakah assist vawi 11 neiin rebound vawi kua a la bawk.

Point 27 neitu Bennedict Mathurin chuan hmun pawimawh a luah bawk a, quarter hnihna leh a hnuhnung ber an chetb ṭhat falna chu an chhawr ṭangkai hle, Game 4 an khelhna tur pawh anmahni mual bawk a nih avangin beisei an nei sang zui ang.

Haliburton chuan, "Player zawng zawng kan khel ṭha vek. Chumi rual chiah chuan Ben Mathurin khan a khel ṭha zual hle a, bench aṭanga player lut leh a bul ṭan tuten mawhphurhna ṭheuh an hlen chhuak," tiin a sawi.

Thunder tan hian Shai Gilgeous-Alexander chuan point 24 a nei a, mahse NBA Most Valuable Player leh Jalen Williams (26 points) te bakah Chet Holmgren (20) bak che ṭha an nei lo a, chak nan a tawk zo lo.

Thunder coach Mark Daigneault chuan, "Kan khel chhia a ni lo a, a bik takin quarter hnuhnung bera nasa taka min nuai kha kan tuar, a tawp hma chuan intlahdah theih a ni lo tih hre mah ila, hrilh nawn kan ngai leh ṭhin," a ti.

NBA champion ni tur chuan a tlem berah vawi li tal an chak a ngai. June 14, Inrinni zing dar 6:00 hian game 4 an khel leh ang.