Club World Cup khel turte an inpeih

Khawvel pum huap football inelna FIFA Club World Cup chu June 14 aṭangin United States-ah khelh a ni dawn a, inelna hmachhawn tur club hrang hrang te an inpeih tawh hle.

Inter Miami khelmual Hard Rock Stadium-ah inelna bul ṭan a ni dawn a, inelna thlengtu ram club Inter Miami leh African champion Al Ahly ten an match hmasa ber an khel ang; khawmualpui hrang hrang aṭanga team 32 inlan te chu group hrang pariatah ṭhenhran niin an inkhel kual hmasa phawt dawn a ni.

Africa leh Asia khawmualpui ten team pali ve ve neiin, khawmualpui mala team ngah ber Europe aṭangin team 12 an tel ang. South American club paruk, Oceania pakhat leh North and Central America, Caribbean ten team pali bakah a thlengtu Inter Miami te an tel dawn a ni.

Kuminah hian Club World Cup vangin nipui bazar dan pawh tih danglam a ni. June 1-10 chhung khan player ziah luh theih a ni a, mahse a hnuah khar lailawk a ni a, June 16 aṭangin ziah luh leh theih niin bazar tawpni September 1 thleng hun a inhawng zui ang.

FIFA president Gianni Infantino chuan, "Team 32 an tel dawn avangin FIFA Club World Cup hian khawvel a huap hneh dawn hle a, khawmualpui hrang hranga player te an inlan thei dawn a ni, anni hian club champion an ti chiang dawn.

"Ram hrang 81 zet aṭangin player an inlan dawn bawk. FIFA Club World Cup hian khawvel huap zo se kan duh ber chu a ni a, khawvel hmun hrang hranga mi ten ennawm ropui an en kha kan duh chu a ni," tiin a sawi.