Naples khawpui pantu De Bruyne

Kevin de Bruyne chuan Manchester City chhuahsanin Napoli a zawm fel ta - Naples khawpui hi football âtchilhna hmun a ni a, an player thar pawh hian bawrtu a ngah rem rem hle, kum hnih daih inremna an ziak a ni.

Belgian midfielder hi Rome khawpuiah a thlawk lut a, chumi hnuah Film Auro headquarters panin Napoli president Aurelio De Laurentiis nen inremna hi an ziak - Serie A champion Napoli chuan, "King Kev a lo thleng" tiin an player thar chungchang an sawi nghal.

De Bruyne hian Jun 28-ah kum 34 a tling tawh dawn, a club hmasa Man City tana a contract a zo a, Italian club hian man nei loin an la lut a, man nei lo mah se agent fee leh bonus chu a la thei tho thung a ni.

Man City a chhuahsan dawn tih a chian hnu khan Major League Soccer club Chicago Fire nen sawi zawm an ni a, Saudi Pro League lamah sum tam tak hlawh tura sawmna a dawng bawk, duh ni se la chuan hlawh tam tak neia khelhna tur a hmu.

Mahse, De Bruyne hian season thara Champions League khelh a la duh, hliam nei loa a khel thei a nih chuan player ṭha bik a la ni reng. Serie A champion tan player chhawr tlak a la ni dawn a, midfield lailum luahtu atan an hmang ang.

Man City tana nomawi 19 tehmeuh chawitu De Bruyne hian, "Tun hnai kum 10 chhung chu kei leh ka chhungte tan Manchester hi kan chenna hmun a ni a, hun nuam leh hlimawm kan tawnna hmun niin theihnghilh theih tawh loh tur a ni," tiin Etihad Stadium a lo thlah tawh a ni.

Napoli-ah hian Manchester United midfielder hlui Scott McTominay leh Billy Gilmour te nen an inkawp thei dawn, tlarhmaah Romelu Lukaku an nei bawk; mikhual tan Diego Maradona Stadium-a lenluh a châkawm lo ang.

De Bruyne a chhuah hnuah Man City hian AC Milan leh Lyon aṭangin Tijjani Reijnders leh Rayan Cherki te an la lut a, an pawt fuh a nih chuan amah thlaktute nen hian Champions League lamah an inhmachhawn thut thei dawn tihna a ni.