Tawnhriat aṭangin kan inzir - Verstappen

Max Verstappen chuan Formula 1 huangah chuan thiam sa thil a awm vek thei lo tih a sawi a, intlansiakna laman an tawnhriat aṭangin zirlai tam tak an zir chhuak ṭhin tih a sawi bawk.

F1 intlansiak hnuhnung berah khan Max Verstappen hian George Russell a ti palh a, a chet dan hian sawi zui a hlawh - Dutch driver hi hrem a nih phah hial a, midang tan hlauhawm taka cheah an puh bawk a ni.

Red Bull driver Verstappen chuan, "A tawp lama kan motor ke hman a fuh lo a, duhthusama ṭhain ka tlan loh bawk avangin ka thinrim kha a rawn irhchhuak ni berin ka hria, khatianga che tur kha chu ka ni lo.

"Mihring kan ni a, thil ṭha leh a ṭha lo lam pawh kan tawng thei vek. Kan thil tawn tawhte aṭangin kan inzir mai ṭhin a, intlansiak kan neih leh turah chuan mawi leh ṭha zawka tlan theih ka inbeisei," tiin a sawi.

Pathianni zan dar 11:30 hian Circuit Gilles Villeneuve tlankawngah Canadian Grand Prix an tlan leh dawn a, tun season tana car intlansiakna sang ber an tlan vawi 10-na tur a ni ang.

Season kal laiah Verstappen hian vawi hnih chiah hnehna a la chang a, a chuangah McLaren driver pahnih - Oscar Piastri leh Lando Norris te an awm, a insiamṭha vat a nih loh chuan atan nomawi humhim a harsa dawn.