Brighton-in striker thar nei

Premier League club-te an inthuam chak zel a, Brighton & Hove Albion pawhin striker thar an nei. Kum 18 mi Charalampos Kostoulas chu Olympiakos aṭangin an la lut a, pound maktaduai 29.78 ngawt an inseng.

Kostoulas hian Brighton tan kum nga khel turin contract a ziak a, July 1 aṭangin Brighton player a ni ang. A khelh ṭhat dan a zirin a man hi £1.7mtd pek belh tur a la ni a, a man a to hle.

Brighton-in Kostoulas-a man atana sum an pek hi Greek club-in player hralhna man an la dawn tam ber a ni a, Wolverhampton Wanderers-in kum 2020-a £16.6mtd-a Olympiakos aṭanga Daniel Podence an leina man a khum.

Hei chauh a ni lo - Brighton hian add-on hi an seng a nih chuan Kostoulas hi Greek player man to ber a ni dawn bawk. Kum 2019 khan Napoli chuan AS Roma aṭanga Kostas Manolas la lut turin £30.63mtd an seng a, hei hi Kostoulas hian a khum thei dawn a ni.

Brighton manager Fabian Hurzeler chuan, "Kostoulas hian Premier League-a khelh a duh a, kan team ti ṭha sawt tur a nih avangin min tiphur hle. Tlarhmaah player kan ngah sawt dawn a, boruak tharah a insiamrem vat theih nan kan pui ang," a ti.

Olympiakos academy chhuak Kostoulas hian nikum khan senior team tana a match hmasa ber a khel ve chauh a, hemi hma hian UEFA Youth League-a an champion theih nan a thawhhlawk hle - Inter Milan, Bayern Munich leh AC Milan an hneh thei.

Season hman zawh takah khan inelna hrang hrangah match 35 khelin goal sarih a khung a, assist vawi hnih a nei - player hmabak nei êng tak a ni.