World champion nih tum - Enrique

Treble champion Paris Saint-Germain chuan Pathianni zan dar 12:30-ah FIFA Club World Cup-a an match hmasa ber an khel dawn a, Spanish club ṭha Atletico Madrid nen an inkhel ang.

PSG hian season duhawm tak an hmang - Ligue 1 leh French Cup-ah an champion hnuin, Champions League final-ah Inter Milan chu 5-0 in an sawp a, treble champion thei tlemte zingah an hming an ziak kai.

Tunah FIFA Club World Cup an khel leh dawn a, coach Luis Enrique-a'n kut ruaka haw a tum lo. Spanish coach chuan, "Season duhawm tak kan hmang a, duhthusama ṭhaa khar turin nomawi chawi leh kan tum ang," a ti.

PSG hi Club World Cup-ah hian Atletico Madrid bakah Brazilian club Botafago leh Major League Soccer club Seattle Sounders FC te nen group khatah an awm ho a, group tin aṭangin a sang pahnih ṭheuh chu round of 16-ah an lut ang.