Mexico-ah Ramsey khel dawn

Cardiff City chuan an player Aaron Ramsey chhuah tur thu an tichiang ta a, Arsenal midfielder hlui hian Mexican club Pumas UNAM a zawm dawn a ni - kum 34 mi a ni ve tawh.

Wales captain Ramsey hian kum 2023 khan amah chher liantu Cardiff hi a zawm a, kum hnih chhung atan contract a ziak - a contract a hmang zo a, chona thar hmachhawn turin Mexico lam a pan dawn.

Ramsey hian Cardiff aṭanga a professional zinkawng zawh ṭanin, season hnih hnuah, kum 2008 khan Arsenal a pan. Gunners tan season 11 zet a khel a, hetih chhung hian Nottingham Forest leh Cardiff-ah loan-in a khel bawk.

Kum 2019 khan rin loh takin Juventus a zawm a, Rangers (loan) leh Nice tan a khel leh hman. Season hman zawh takah khan, coach Omer Riza ban vangin, an league match hnuhnung pathumah manager hna a chelh lailawk a, mahse, an relegate tho.

Cardiff hian season thar aṭang chuan League One an khel dawn a, Ramsey hi coach ni zui tura sawi ni mah se, a chhuak dawn ta zawk a ni.