Cazorla a la thiam reng

Kum 40 mi Santi Cazorla-a'n a kum tam tawh mah se, a thiam a la theihnghilh lo tih pholangin, a club Real Oviedo chu La Liga playoff khel turin a hruai thleng.

Real Oviedo hian playoff semifinal-ah Almeria an hmachhawn a, second leg-ah 1-0 a an hnufual laiin Cazorla a lut. Arsenal midfielder hlui hian khelmualah minute li chiah hun a hmang hman tihin, a ke vei lamin freekick mawi zetin a chhuih lut.

Cazorla goal khung hmang hian, Real Oviedo hi inkhel pahnih belhkhawmah 3-2 in an chak a, playoff final an thleng - season thara La Liga khelhna chance a sang ta hle. An tlin chuan kum 2001 hnua La Liga an khelh leh hmasak ber a ni ang.

Cazorla chuan, "Ka hun tawp a hnai tawh tih ka hria a, ka career-a hun tlem ka la neih hi a ṭha thei ang bera hman ka tum a ni. Nuam ti taka hun hman ka duh a, chu chu a pawimawh ber niin ka hria.

"Inkhel bul ka ṭan dawn lo tih ka hriat khan hrehawm ka ti a, he game pawimawhzia ka hria a, ka team ka pui thei hi ka lawm hle," tiin a sawi.

Spain tana Euro nomawi vawi hnih ngawt lo chawi tawh Cazorla hian Arsenal-ah season ruk khelin, a hming a chher hle. Mahse, October 2016 khan a keah hliam a tuar a, vawi 11 zet zai hmachhawnin, a hun tawp season hnih chu hliam vanga inenkawlin a hmang.

Hetihlaia enkawltu doctor chuan, a kea a kal leh thei a nih chuan lawm turin a hrilh a, theihtawp a chhuah hnuah a inkhel leh ta hial - Arsenal a chhuahsan hnuah Villarreal leh Qatar club Al Sadd tan a khel.

Kum 2023 khan a inzirna Oviedo-ah a kir a, a thlawna khelh hial inhuam mah se, Spain ram danah phal a nih loh avangin a hlawh tlem theih ang ber hlawh chungin second division club tan hian a khel - La Liga-a hruai kir thei dinhmunah a ding mek ta.