Tennis kan khel hnai tawh ang - Djokovic
Novak Djokovic chuan Covid-19 hri leng karah tennis an khelh leh thuai a beisei thu a sawi a, an inkhel ṭan leh a nih pawhin hmun hran hrana zin kual loin ram bil inelna an neih hmasak a rin thu a sawi.
ATP leh WTA te chuan March thla aṭang khan inelna zawng zawng an titawp lailawk vek. Clay bakah grass court inelna awm dawn lo tawp tihna a ni a - French Open erawh a hun sawnin khelh hram an la beisei thung.
Serbian tlangval Djokovic chuan, "Ram bil inelna siam a pawimawh ka ti, player zinkual vak kher loa mahni ram chhunga tournament an khelh theih tur buatsaih a ṭhain ka hria a, hetiang inelna hi kan neih thuai pawh ka beisei.
"Ram hrang hrangin kan tawrh dan leh hmachhawn dan a inang lo a, chutiang bawkin player-te sum leh pai dinhmun pawh a inang lo. Tournament khelh aṭanga sum hmuh mamawh lem lo an awm laiin, mamawh ngawih ngawih pawh a awm theih," a ti.
World number 1 Djokovic hian Roger Federer leh Rafael Nadal te nen player ranking hniam zawk leh sum lama harsatna neite puih an tum thu a lo sawi tawh, player tam tak chu sum lama harsatna tawk an awm.
Djokovic chuan sawi zawmin, "Spain leh Italy te tuar dan leh ram dang tawrh dan chu khaikhin chi pawh a ni lo ang. Anni tan chuan kumin chhung pawh inkhelh a harsa a ni mai thei, ram ṭhenkat erawh chuan an tuar na lutuk lo," a ti.
Italian tlangval, world number 11 Fabio Fognini chuan, "Serbia-ah chuan May 20 aṭangin inkhelh theih an beisei, Spain lamah chuan June 25 vel an tinzawn. Ka ram aṭanga thlir erawh chuan tun season atana inkhelh leh pawh beisei ngam a har," tiin a sawi.