IPL 2020 mumang ang maiin a thâmral dawn maw?

Famkim lohna khawvel, lei anchhedawng tih takah thil zawng zawng hi duh ang diak diak leh suangtuahna anga kal thei vek ni hek suh. Kum 2008 aṭanga awl nei miah lo a, kum 12 chhûng kum tin Ṭâu thla aṭanga ṭan, hapta ruk/sarih vel chhûng cricket ngainatute mit lo titlai tawh ṭhintu, infiamna khawvela a sum chêt tamna ber zinga mi, IPL chu a kum sawmpathum pianchampha lawm thei lo dinhmunah a ding ta mêk chu a ni. "Infiamna khawvelah chuan hlim ni leh ṭah ni a inkarthlâk ṭhin a, lungngaihna ruam zawh thiam dante min zirtir ṭhin" an tih ṭawngkam hi, a inkhel pakhat êm pawh an ṭan hma hian kan innghahna chang a nih tâk hmel hle.

Khawvel infiamna league chi hrang hrang zinga kum tin entu leh ngaihventu ngah a sang panga zinga lang thei, kum 10 chuang awrha upa, khawvela infiamna Live-a Youtube-a pêkchhuah hmasak ber, kum tin deuhthaw India Economy GDP-a, chêng tluklehdingawn sawmpahnih vel 'contri' ṭhin, a sakhming lamtawia, IPL an tih hi eng dang ni lovin Indian Premier League a ni a. Cricket game version naupang ber leh tawi ber Twenty20 hmanga India ram khawpui lian hrang hrang hming chawia 'franchise' inelna lian a ni.

Hmakhawsâng aṭangin cricket game level sang ber hi chu International-a ram leh ram inelna tournament leh intlawh tawn (tour series) hi a ni mai a. Football-te angin club inelna hi a awm lo.

Mahse 90s chhova EPL te, NBA te, Formula 1 leh infiamna dang te khelmual pawnah nasa takin 'marketing' hmangin a ṭhang. Infiamna chu eizawnna lian takah a ṭhang chho a, industry lian tak a ni ta. Cricket-ah pawh a theih ve reng a ni tih hmu ranin, Rajasthan sumdawng hausa leh Management thiam Lalit Modi (Narendra Modi nen inlaichinna nei lo) chuan 1995/96 chho daih tawh khan BCCI-ah a suangtuahna chu a lo thlen tawh ṭhin a, mahse tuma'n an ùksak ngai lem lo.

BCCI chuan kum 2006 khan cricket telecast right ( inkhel pekchhuah theihna) chu a tih ṭhin ang bawkin an lilam. India rama cricket thuneitu sang ber BCCI pawh hi 'inthamnaah' a fimhlim bik lo a, hemi hma hian telecast right hi ESPN Star lakah tlawm takin an peah an ngai.

Kum 2006-ah hian Zee TV neitupa, billionaire hausa, Subash Chandra chuan ngam huai ber a tum tawh hle. Cheng vaibelchhe sangthum chuang zetin Nimbus (Neo Sports) nen chuan an inngamhuai siak ta. A tawpah chuan Subash Chandra bawk chu thil dang hrang hrang vang nen, a tlawm zawkah a ṭang. Mahse Chandra lungawi thei lo chuan, "Phuba lak nan kan ti ve mai ang e," tiin a thiltihtheihna a pholang ve ta.

BCCI remtihna la loin Chandra hian India mipui ngaihsan rawn, cricket pathian an tih mai Kapil Dev leh hranghlui player ṭhahnem tak, management thiam te, state sawrkar chi hrang hrang a sawm khawm. Chandra lam ṭangah hian India domestic player-ah pawh India team-a lut mai tura theihna nei Rayudu, Binny leh te an in nih nuk hlawm avangin state ṭhenkhat chuan an first class team (Ranji Team) pumpui deuhthaw an chan hial.

International star tam tak (Pakistan team pumpui deuhthaw), cricket legend Brian Lara, Shane Bond leh midang te chu sum tam takin an sawm chhuak. News Media-ho chaw tui ni turin thâwklehkhatah khawvel mit hmuhah Indian Cricket League (ICL) chu an phochhuak ta thut a, Cricket khawvel a deng chhuak hneh hle.

A tawi zawngin, inhruipawh nasa takin a zui a. Cricket khelmual pawnah indona tenau a piang ta chu a ni der. Zan 'prime time'-a ZEE Sports-in ICL live-a an pechhuak chu, lar namen loin a lar a. Players leh staff ṭhenkhatin nuai tam tak an hlawh te, a ṭhenin a vaibelchhia an hlawh te, 5 Star hotel leh facilities ṭha ber ber engkima an han chevel chu cricket khawvel chil tipûttu leh tiṭhanghartu a lo ni ta.

Khawvela Sports Body (infiamna zawng zawng)-a hausa ber lawr lak, BCCI tân mutthlûk reng a hun ta lo, ṭhangharh piah lamah insanmara a siruk laa thawhchhuah a hun ta.

BCCI rorel khawl chuan an zahna tuam dama, a chhe lai siamṭha tur leh a aia sang zawka invawrhtir turin tu dang ni loin khatih hunlaia BCCI Vice President dinhmun meuh lo luah chho ta, zawlnei der ang maia a hmaa an hnawl Lalit Modi kutah thuneihna an pe.

Subash Chandra te ang hmetdai turin Modi remruatna ṭha a nei a, a hneh lah a hneh narawh e. ICC leh BCCI ten an hnuchhawn ICL zawk chu a tirah rawn ri hluai mah se, ṭhâl ruahtui bawhawk, hâwktui anga luang ral leh mai chan a chang a, a zuzi zui ta der a. Baptistu Johana ianga lo la kal tur, a aia ropui zawk tâna kawng lo sial lawktu ang mai chauh a ni.

Kum 2007 favang a lo inherchhuah meuh chuan BCCI-in EPL leh NBA entawna an duan, khawvela cricket league lian ber leh sum chevel tam berna tur, India Premier League a pian thu an puangzar ta. Kum 2008 Ṭau thlaah, thu chu tisaa chantir a nih tur thu an puangzui ta bawk.

India ram khawpui lian pariat hming chawiin team pariat chu neitu nihna chang turin khawvel leh India mi hausa, Bollywood star rual ho an fuankhawm ta. A inkhel êm pawh an ṭan hma ngawtin, Ambani te, Shahrukh Khan te, Vijay Mallya etc te hoin team an leina man tlingkhawm ringawt pawh chu cheng vaibelchhe sangnga chuang a ni nghal phawt.

Chutichuan, chu IPL chu a lo ṭhang duang zel a, tun dinhmunah phei chuan a hlutna hi cheng vaibelchhe singnga lai ni tawh. Amaherawhchu tunlai natna ṭihbaiawm tak, Covid -19 avang hian IPL vawi 13-na hi Wimbledon te anga ṭhulh theih dinhmunah a lo ding ve ta. 2020 kum bera Twenty20 inkhawmpui lian kan thleng thei lo mai tur erawh han dawnin, lunglai a dam thei mawlh lo a nih hi maw!