Premier League club bihchianna Matthew Le Tissier, Claus Lundekvam leh Jason Dodd
Premier League awm hnuah Southampton-in nomawi lian tham an la chawi lo a, player ṭha erawh ṭhahnem tak an chher chhuak. Liverpool-in pound maktaduai 75-a Saints aṭanga an leichhuah Virgil van Dijk hi tun dinhmuna khawvel defender ṭha ber ang hiala chhal theih a ni a, Southampton-ah erawh legend ni pha tur khawpin a khel tam tawk lo.
Southampton kawr mawipuitu kan thur chhuak dawn a nih chuan Premier League-a goal khung leh assists nei tam ber Matthew Le Tissier telh ngei a ṭul a, defender pahnih Claus Lundekvam leh Jason Dodd te hmaih an thiang lo. Goal khung thei dang James Beattie leh Marian Pahars te hming lam rik ruala lungleng em em a awm theih bawk ang.
Midfielder goal khung thei
Southampton chanchinah Matthew Le Tissier-a'n hmun pawimawh a chang a, midfielder zinga Premier League-a goal 100 khung thei hmasa ber a ni. Le Tissier hi penalty pet thiam vangin a lar a, spot aṭanga vawi 48 a petah vawi 47 a khung.
October 14, 1968 khan Le Tissier hi Guernsey-ah a piang a, kum sarih leh 16 inkarah khawtual club Vale Recreation tan a khel. Kum 15 a nih laiin Oxford United-ah a trial a, a hlawhtling lo. Le Tissier hian kum 1985-ah Southampton youth team a zawm a, October 1986-ah professional contract a ziak. English midfielder hian kar khatah £100 chauh a hlawh.
Le Tissier hian hming a chher chho a, 1989-90 season khan PFA Young Player of the Year-ah thlan a ni a, hemi season hian goal 20 teh meuh a khung. A tluk loh pahnih chu Gary Lineker leh John Barnes te chauh a ni. Southampton midfielder hian First Division leh Premier League-ah match 443 khelin goal 161 hial khung mah se England tan vawi riat chauh a inlan.
World Cup 1998 hma khan Le Tissier hian England B tan hattrick siamin Loftus Road-ah Russia B 4-1 in an hneh a, ram tana khel tlaka ngaih ni mah se England manager Glenn Hoddle-a'n player 30 a thlanchhuahah pawh a tel lo. Hemi hnu hian Saints legend hi England tan a inlan tawh lo.
Southampton tan Le Tissier hi ambassador a la ni reng a, kum 2011 khan an khaw club Guernsey FC-ah club president a ni. Guernsey-ah Le Tissier hi pa langsar a ni a, February 2007 khan a hming chawiin thlawhtheihna hming an phuah hial.
Dodd leh Lundekvam
Football-ah goal khungtu an langsar a, defender-te an phu angin chawi an ni ṭhin lo. Southampton ṭantu tan match 329 leh 290 inlan thei defender Jason Dodd leh Claus Lundekvam ten hmun pawimawh an chang ang.
Jason Dodd hi November 2, 1970 khan Bath-ah a piang a, Bath City tan bul ṭanin 1989 khan £15,000-in Southampton-in an lalut. December 2003 khan Dodd hian corner aṭangin Portsmouth lamah a khung a, amaherawhchu defender Sebastien Schemmel 'own goal'-ah an chhiarsak thung.
Dodd hian Saints tana a khelh hnuah Brighton & Hove Albion leh Eastleigh tan a khel a, kum a upat tawh avangin match sarih leh match thum chauh a khel a. Kum 49 mi Dodd hian kum 2008 khan Saints-ah letin director of the youth academy hna a chelh a, Luke Shaw, Calum Chambers leh James Ward-Prowse ten first team an khelh theihna siamsaktu a ni.
Norwegian defender Claus Lundekvam hian ram tan match 40 a khel pha a, kum 2002 khan Norway tana goal hmasa ber khungin Norwegian national team history-a goal 1000 na a ni. Saints-in 2003 FA Cup final an thlen khan Dodd leh Lundekvam te hi player pawimawh a ni a, final-ah Arsneal an hneh lo.