UEFA-in league ṭhenkhat cancel a pawm
European football-a thuneitu sang ber UEFA chuan coronavirus hri leng vanga league ṭhenkhat cancel ngai a awm thu an sawi a, hei erawh 'hriatthiam ngai bik' huanga awm an nih thu an sawi.
Thawhlehni khan UEFA hnuaia ram 55 aiawhte chuan video coneference hmangin inbiakna an nei a, season hman zawh a nih theih dan tur chungchangah an inbe rawn.
UEFA hian tun thlatir lam khan ram hrang hrang-te chu league titawp lo turin thurawn an lo pe tawh a, league tihtawp chuan Champions League leh Europa League-a an hmun tur a nghawng theih tur thu an hrilh.
Mahse, beisei angin football khawvelin ngai a awh hleithei lo a, UEFA pawh a nem ve ta deuh. European football-a thuneitu sang ber chuan, "Tualchhung league leh cup inelna te chu zawh hram theih ni se tih hi duhthusam a ni.
"Mahse, hriatthiam chin neih a ngai ve ta niin a lang a, chung ho dinhmun chu European competition-a an tel theih dan tur guideline siam a nih hnuah ngaihtuah theih a ni ang," an ti.
European top flight league zingah Belgian Pro League chu tihtawp a ni tawh a, Dutch football-a league sang ber Eredivisie chu tihtawp mai theih dinhmunah a ding mek bawk.
UEFA hian 2020-21 season atan an hnuaia inelnate qualification khelh dan tur an ngaihtuah mek - league tam tak khelh zawh hun hi a tlai dawn avangin qualification thleng hian a nghawng dawn a ni.
Ruahmanna awm mekah chuan tualchhung league hrang hrangte hi June-a khelh ṭan leh hman hram tura beisei an ni a, Champions League final chu August 29-ah khelh an beisei thung.