Aurier & Sissoko-ten ngaihdam an dil

Tottenham Hotspur player Serge Aurier leh Moussa Sissoko-te chuan coronavirus vanga inkharkhip kalpui a nih laia training an lo nei chu ngaihdam an dil a, "Midangte tana entawn tlaka kan nun loh avangin ngaihdam kan dil a ni," a ti. Spurs right back Aurier hian social media lamah hmai tuamna a vuah chunga a insawizawi lai a pho chhuak a, a bulah hian Sissoko a lo lang bawk. UK sorkar dan chuan Covid-19 hri len chhungin 'mahni chauh' a nih loh chuan in khata chenpuite nen ngei lo chuan insawizawi phal a ni lo. 

Player pahnih chuan thuchhuah inṭawm siamin, "Professional footballer kan nihna angin mite entawn tur hnutchhiahtu tur zawk kan ni tih kan hria a, a bik takin khawvelin hun harsa a tawh mekah hian midangte tana entawn tura nung tur kan ni. 

"He hri leng hlauhawm tak avanga nunna chan awm zel tur ven nan sorkar thupekte zawm ang u. He hun harsa tak kara NHS staff-te hnathawhna leh inpeknaah kan lawm em em a, kan lawmzia entir nan pawisa pawh kan thawh dawn a ni," an ti. 

Spurs hian Covid-19 hri leng karah hmingchhiatna an nei leh ṭhin. Manager Jose Mourinho chu a midfielder Tanguy Ndombele nen park-a an training lai hmuh a lo ni tawh a, Ryan Sessegnon leh Davinson Sanchez-te pawh park-a an insawizawi lai hi hmuh a ni bawk.