Max Verstappen hmaah Russell a thleng

Mercedes car a khalh hnuin George Russell chuan Formula 1 huangah a vawi khat nan hnehna a chang - Pathianni zana tlan zawh tak Canadian Grand Prix-ah a chak ber a, atan hun chhinchhiah tlak a ni ngei ang.

Circuit Gilles Villeneuve-a intlansiakah Russell a chungnung a, champion lai Max Verstappen hmaah a thleng; pathumna chu Kimi Antonelli a ni thung. McLaren driver pahnih Oscar Piastri leh Lando Norris te chet danin sawi zui a hlawh bawk.

Russell-a hun

George Russell-a tan Formula 1 huangah hrim hrim chuan vawi li a chakna a ni a, mahse kumin aṭangin Mercedes car a khalh; a team thar tan hnehna chang tur hian a hmasa ber aṭanga tlan ṭanin a tlan ṭha hle, harsatna lian tham tak a tawk lem lo.

Car intlansiakna sang berah hian tun season chhungin driver pali - Piastri, Norris, Verstappen leh Russell ten hnehna an chang tawh a, kum dang angin fal taka kal thei kha an la awm rih loh avangin nomawi inchuh boruak a sang dawn.

British tlangval Russell chuan, "Hnehna ka chan hnuhnung ber chu nikum November daih tawh kha a ni a, tunah ka hun a rawn inherchhuak ve leh ta, keimah chauh ni loin ka teammate Kimi Antonelli nen dawhsana kan lawn thei hi a lawmawm.

"Team ṭha tak kan nei tih a chiang a, chumi bakah chuan boruak hnawng leh vawt deuhah kan car a ṭha zual tih fiah in a awm bawk. Tunah chuan beiseina sang tak nen hma lam hun kan thlir dawn a ni," tiin a sawi.

A hnungah Max-a

Season hmasa tir lamah kha chuan Max Verstappen hian amah elphaktu a nei lo, fal takin a tlan par par ṭhin - season chawhnu lam aṭangin a tlahniam a, champion tho mah se kuminah chuang a tlan chak ber a ni hleithei rih lo, kawng a khirh chho dawn niin a lang.

Red Bull driver hian hlauhawm taka chet lak chang te a nei leh zauh ṭhin a, hrem theih dinhmuna ding mek a ni; hremna na zawk a hmachhawn a nih phei chuan intlansiak vawi khat hmachhawn thei loa tura tih theih a ni dawn hial.

Dutch tlangval Verstappen chuan, "A tir lamah khan kan motor ke thlan fuh tawk loh vangin kan buai a, a hnuah insiamṭha mah ila duhthusam angin a thleng thei ta lo, tuna kan thlen chin hi kan theih ang tawk a ṭha a ni," tiin pahnihnaah a lungawi a ngai.

World champion vawi li ni tawh Max-a hi tun season chhungin vawi hnih chauh a la chak a, point 155 hmu tawhin driver championship table-ah pathumna a ni mek, a chungah McLaren driver pahnih Piastri leh Norris te an awm.

McLaren buaina?

McLaren driver pahnih Lando Norris leh Oscar Piastri ten season duhawm an hmang mek a, champion turin kawng dik an zawh ve ve. Mahse, Circuit Gilles Villeneuve tlankawngah anni pahnih hi an inbakkaih a, chanchinbu miten an sawi zui nasa hle.

Lap li chauh tlan hmabak an neih tawh laiin Norris hian Piastri tlan pelh a tum a, a theih mai loh avangin a teammate car hnung lam a sutsak! Britian tlangval Norris hi a tlan zui thei lo, hetihlai hian Piastri erawh palinaah a thleng thei ta hram thung a ni.

Tun season chhunga vawi nga hnehna chang tawh Piastri hian championship table-ah hma a hruai chhunzawm a, a teammate Norris aiin point 22-in a sang zawk mek; an hnuai maiah Verstappen a la awm bawk avangin inthlahdah a thiang dawn lo.

Khawvela car intlansiakna sang ber hi June 29, Pathianni zan dar 6:30 hian an tlan chhunzawm dawn. Red Bull Ring-ah Austrian Grand Prix an tlan dawn a, Red Bull team leh an driver Verstappen tan insiamṭhat theihna remchang ni tura ngaih a ni.