Italy coach 23-na Gattuso

Gennaro Gattuso chu Italy coach atan ruat fel a ni ta a, an ram team enkawltu coach 23-na niin tun hnai kum 50 chhungin Azzurri hian coach 15 an neih tlinna a ni ta chiah bawk.

Player a nih laia Italy midfielder ni ṭhin hian Luciano Spalletti a thlak a, player a nih laiin hlawhtling viau mah se team enkawl kawngah erawh sulhnu ropui a la ngah lutuk bik lo, a tan zir tur tam tak a awm ang.

Italy hian Euro 2020 nomawi an chawi a, a hnuah erawh an khel phak lo. World Cup hnuhnung pahnihah pawh an hmel kan hmuh lo, an khelh fuh leh fuh loh kar a hla ṭhin hle, coach thar Gattuso tan World Cup 2026 atana thlin tum chu hna pawimawh a ni dawn.

June 3 khan World Cup qualifying-ah Italy hian Norway chu 3-0 in an ngam lo; anmahni aia ram ṭha lo zawk tura ngaih laka an tlawmna hian a nghawng na hle, coach Spalletti-a an ban chhan lian tak niin a ngaih theih bawk.

Italian football federation (FIGC) president Gabriele Gravina chuan, "Gattuso hi Italian Football tana mi pawimawh leh chhinchhiahna langsar tak a ni a, kan ram football kalphung hrechiang em em tu a ni.

"A tan chuan jersey pawl hi a vun ang maiin a taksa leh rilruah a bet tlat. Puitling leh ruahmanna fel tak nena player kaihruai thei a ni a, player lam pawhin a fuih phurnna an zawm ṭha hle ang tih kan ring," tiin a sawi.

Player a nih laiin AC Milan tan Serie A leh Champions League nomawi vawi hnih ve ve a chawi thei a, an ram Italy hi FIFA World Cup 2006 khan a champion pui bawk; inelna lian leh boruak sang hre ṭang tawh sa a nihna hi a ṭangkai thei ang.