Messi-a'n US-a inkhelh a duh
Barcelona captain Lionel Messi chuan USA lama la inkhelh ngei a duh thu a sawi a, hetihrual hian a hma hun hman dan tur erawh chiang takin a sawi thei bik lo.
Kum 33 mi Messi hian June-ah Barcelona-a a contract neih lai a hmang zo tawh dawn a, January-ah hian a duh ang zawng club be turin zalenna a nei - football ngainatute chuan August thlaa Messi-a'n Barca chhuahsan dilna lehkha a thehluh kha an la theihnghilh lo ang.
Messi hian Spanish television channel La Sexta hnenah, "Eng nge ka tih dawn ka la sawi thei lo. Season tawp thleng nghah phawt ka tum a, US lama inkhelha, an league leh nunphung va tem ve chu ka châk khawp mai, mahse, a tawpah chuan eng dinhmun emaw tak chelh tura Barca lama kir bawk ka rilruk a ni," a ti.
Argentine forward chuan tun atana pawimawh ber erawh tun season a nih thu sawiin, "Tunah rih chuan team lama insawrbing a, duhawm taka season khar dan tur hi kan ngaihtuah phawt a ngai - thil dang intihbuai tir miah loa nomawi chawi kan ngaihtuah a ṭul a ni," tiin a sawi.
Season hmasaa nomawi chawi nei lo Barcelona hi tun hnaiah an talbuai a, an dinhmun a duhawm lo hle - tun season La Liga-ah pawh beisei an phak lo hle. Catalan club hian league match 14 khelh tawhah vawi sarih chiah chak an la nei a, vawi thum an khingpui inhnehtawkpuiin vawi li an tlawm der tawh.
La Liga table-ah pangana an ni mek a, zanin dar 11:45 hian Krismas hnua a vawi khat nan an dinhmun siam ṭhat tumin league match an khel dawn a, Eibar an mikhual ang.
Barca tan hian insiamṭhat mai erawh a awlsam dawn lo - hemi hrechiangtu Messi pawhin insiamṭhat a har tur thu hi a pawm. August-a chhuah a dil khan club an talbuai viau a, club president Josep Maria Bartomeu chu October khan a ban phah hial.
Messi chuan, "Club leh midang zawng zawng tan pawh hun harsa tak a ni a, club hrechiangtu chuan kan dinhmun duhawm lohzia kha an hre vek ang - kan awmna ṭhina awm leh chu thil harsa tak tur a ni," tiin a sawi.
La Liga-ah Atletico Madrid chu match 13-a point 32 hmuin hmahruaitu an ni mek a, an hnuai chiahah match hniha khel tam chungin an point hmuh ang zat hmu Real Madrid an awm.
Zanin Inkhel Tur
Sevilla 09:30 PM Villarreal
Barcelona 11:45 PM Eibar
Cádiz 02:00 AM Real Valladolid
Levante 02:00 AM Real Betis
December 30, Nilaini Zan
Granada 09:30 PM Valencia
Atletico Madrid 11:45 PM Getafe
Celta Vigo 11:45 PM Huesca
Elche 02:00 AM Real Madrid