Leeds-in Nmecha la lut

Championship aṭanga Premier League kai thar Leeds United chuan VfL Wolfsburg aṭangin forward Lukas Nmecha an la lut a, German club-ah a contract a hman zawh tawh avangin free transfer-in English club hi a zawm.

Nmecha hian Leeds-ah hian kum hnih khel turin contract a ziak a, Manchester City academy chhuak a nih avangin English football-ah a mikhual lo - Pep Guardiola hnuaiah a match hmasa ber a khel.

Kum 26 mi Nmecha hian Preston North End, Wolfsburg, Middlesbrough leh Anderlecht-ah te loan-in a lo khel tawh a, Wolfsburg hi kum 2021 khan a nghetin a zawm ve chiah.

Germany tana vawi sarih inlan tawh forward hian season hman zawh takah khan Bundesliga club tan match 20 a khel a, goal thum a khung. Leeds boss Daniel Farke-a'n tun nipuia a player lakluh hmasak ber a ni a, July 1-ah official takin Leeds hi a zawm ang.