Spurs leh Chelsea an chak zo lo
Tottenham Hotspur-in Liverpool chak zawh loh thu hre sain Wolverhampton Wanderers lenchilh mah se hnehna an chang zo bik lo a, khualmual aṭangin 1-1 result an hawn thei hram.
Spurs tan hian Tanguy Ndombele chuan second 57-na lekah yard 20 vela hla aṭangin goal hmahruai a khung a, goal khung hma ringawt mah se goal dang erawh an nei thei lo - a tawpah point hnih an hloh phah.
London club hi chak tura ngaih an ni tawh a, mahse, hun tawp nan minute li chauh a awm tawh tihah Romain Saiss chuan si phurh sutna goal Wolves tan a rawn khung a, a team tan point khat hlu tak a hlawh chhuak.
Wolves hian Fabio Silva hmangin chak theihna remchang an nei hial a, mahse, kum 18 mi Fabio Silva chuan a hun ṭha neih goal-ah a chantir thei lo a, a team tan point thum a hlawh chhuak thei lo.
Premier League-a tlarhma inkawp hlauhawm ber pawl Harry Kane leh Son Heung-min-te tan zan theihnghilh tlak a ni a, Wolves-in forward pahnih an 'dah ṭha' thei chu inchhuanna tham a ni.
Spurs attacking a na tawk lo a, hei hi Tottenham manager, defensive game uar ve tak Jose Mourinho chuan a sawisel. Portuguese manager chuan, "Tlarhnung lam ringawt buaipuia khelh kha ka khelhtir dan a ni lo.
"Chawlhlawk lai khan an laka ka phut chu ka player-ten an hria a, an ti ṭha thei lo a nih chuan an ti thei lo a ni mai. Result duhawm lo tak a ni a, game kan thunun hman - mahse, minute 89 chhung goal khung belh turin hun kan nei a, kan khung miau si lo a ni.
"Goal khung loh rikngawt hi buaina tur a ni lo a, tlarhmaa kan hlauhawm tawk lohna leh tum tawk lohna kha ka tan chuan buaina tur a ni," tiin a sawi.
Spurs hian Wolves lakah hnehna chang se chuan hmahruaitu Liverpool an phak lohna chu point li chauh ni thei tur a ni - mahse, an chak zawh loh miau avangin Reds hi point rukin an phak lo.
Nizan inkhelah Chelsea-in hnehna chang zo loin Aston Villa chu 1-1 in an inhnehtawkpui a, Spurs hi table-ah pasarihnaah an tla thla zui - Villa leh Chelsea nen hian an point hmuh zat a inang. Villa-in league match 14 khel tawhin Chelsea aiin match hnihin an khel tlem a, Blues ai hian Spurs-in match khatin an khel tam bawk.
Chelsea tan Olivier Giroud chuan goal hmahruai khung mah se Anwar El Ghazi chuan a match hnuhnung pangaa a goal ngana ni turin Villa tan a chhanglet a, Blues nen point an insem.
Nizan inkhel tur dang Everton vs Manchester City chu Covid-19 in City chhungkua a tihbuai avangin a khelh hun sawn a ni.
Inkhel Result
Wolverhampton Wanderers 1 - 1 Tottenham Hotspur
WOL: Romain Saiss 86'
TOT: Tanguy Ndombele 1'
Crystal Palace 1 - 1 Leicester City
CRY: Wilfried Zaha 58'
LEI: Harvey Barnes 83'
Chelsea 1 - 1 Aston Villa
CHE: Olivier Giroud 34'
AST: Anwar El Ghazi 50'
Zanin Inkhel Tur
Brighton & Hove 11:30 PM Arsenal
Burnley 11:30 PM Sheffield United
Southampton 11:30 PM West Ham
West Brom 11:30 PM Leeds United
Manchester United 01:30 AM Wolves
December 30, Nilaini Zan
Tottenham Hotspur 11:30 PM Fulham
Newcastle United 01:30 AM Liverpool